Bíblia nia papél

Tanba Maromak Nia liafuan mak moris no iha podér, no kro'at liu fali surik neʼebé kro'at iha sor-sorin. Liafuan ne'e sei sona to'o fahe mós klamar no espíritu, fukun no dolen, no bele hatudu fuan laran nia hanoin no kompriensaun. Ebreu 4:12 BK 

Ebreu 4:12

Bíblia iha papél importante iha ema fiar-na'in ida-idak nia moris. Bíblia la'ós de'it livru antigu ida ka klesaun livru istória nian. Bíblia mak Maromak Nia Liafuan ne'ebé moris ne'ebé ko'alia mai ita-nia laran no dirije ita-nia moris. 

Epistola Ebreu 4: 12 hatete katak Maromak Nia Liafuan mak moris no poderozu. Maromak Nia liafuan kro'at liu fali surik ida-ne'ebé iha isin rua no bele julga ema nia hanoin no atitude. Ne'e katak Biblia bele hatudu ba ita saida mak loos no saida mak sala iha ita-nia moris. Bíblia ajuda ita atu haree ita-nia sala no fó korajen mai ita atu arepende hosi ita-nia sala. 

Bíblia mós hanorin ita oinsá atu hetan salvasaun. Tuir Timoteo 3: 15-17, Eskritura sira ajuda ita atu hetan salvasaun liuhusi fiar ba Jesus Kristu. Maromak Nia Liafuan mós hanorin, korrije no fó treinu mai ita atu nune'e ita bele prontu atu halo serbisu di'ak hotu. 

Jesus rasik halo orasaun ba Maromak hodi hatete iha Evanjellu João 17:17: "Halo sira santu liu hosi lia loos. O nia liafuan mak lia loos". Bíblia mak lia-loos ne'ebé ajuda ita atu sai santu no moris ho moris ne'ebé halo Maromak kontente. 

Maromak Nia Liafuan mós halo ita iha fé. Efeso 1:13 fó-hanoin ita katak kuandu ema rona lia-loos, evanjellu salvasaun nian, no fiar, Maromak sei hametin sira ho espíritu santu. 

Bíblia nia papél seluk mak atu proteje ita-nia laran husi sala. Livru Salmo 119: 11 hatete: "Hau subar ona ó-nia liafuan iha ha'u-nia laran atu ha'u labele halo sala hasoru ó." Kuandu ita lee, aprende, no hanoin Maromak Nia Liafuan, ida-ne'e ajuda ita atu tahan hasoru tentasaun. 

Maibé, ita so bele komprende Biblia bainhira ita haraik-an no laran-espiritual. 1 Korinto 2:14 esplika katak "... ema naturál la simu buat sira nebee mai hosi Maromak nia Espíritu". Ita presiza Maromak nia ajuda atu komprende ho loloos Maromak Nia Liafuan. 

Ikusmai, Biblia fó-hanoin ita kona-ba Maromak Nia domin ne'ebé fiél. Livru Lamentasaun 3: 22-23 hatete katak Nai Nia laran-sadi'a foun dadeer-dadeer. Liuhusi Biblia ita aprende kona-ba Maromak Nia laran-sadi'a no Ninia promesa sira ba ita-nia moris. 

Bíblia hanorin ita, korrije ita, hametin ita-nia fiar, no halo ita hakbesik liután ba Maromak. Kuandu ita lee no halo tuir Maromak nia Liafuan, ida-ne'e ajuda ita atu la'o iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏