Seidauk tarde liu atu buka Nai

Buka ita Nai bainhira ita bele hetan Nia, bolu ba Nia bainhira Nia sei besik. Isaias 55:6 BK 

Isaias 55:6

Ema barak hanoin katak sira la'o dook liu ona iha sira-nia pekadu no hanoin katak Maromak sei la simu tan sira. Sentimentu sala ka moe halo ema hanoin katak tarde liu ona atu fila fali ba Maromak. Maibé profeta isaias nia mensajen ohin loron fó-hanoin ita katak kuandu ita iha oportunidade atu buka Nai, odamatan grasa nian sei nakloke nafatin. Maromak konvida ema pekador atu fila fali ba Nia bainhira Nia sei besik no banhira tempu sei iha.

Versíkulu ne'e ko'alia ba ita asaun importante rua: buka Maromak no bolu Nia. Buka Nai katak ita hakarak fiél ba Nia, no rekoñese katak ita presiza Ninia ajuda no matadalan. Bolu ba Maromak katak halo orasaun no husu Ninia laran-sadi'a. Maromak la dook ka lakohi fó perdua. Maibé, Nia prontu atu simu ema ne'ebé fila fali ba Nia ho laran-moos. 

Bíblia filafila hatudu katak Maromak simu ema ne'ebé arrepende an. Iha Lucas 15:20, aman halai hasoru ninia oan-mane ne'ebé fila fali, hodi hatudu oinsá Maromak simu ho laran-manas ema ne'ebé fila fali ba Nia. Nune'e mós, 2 Pedro 3: 9 hatete katak Nai hatudu pasiénsia, lakoi ema aat mate, maibé Nia hakarak ema hotu arrepende an. Maski ema ida la'o dook ona ona hosi Maromak, maibé Maromak Nia laran-sadi'a sei iha nafatin. 

Maski nune'e, profeta Isaias mós fó-hanoin ita katak ita la bele demora bainhira ita hetan oportunidade. "Bainhira ita sei bele hetan Nia" signifika katak ita tenke responde ba Ninia konvite ohin loron. Moris iha mundu ne'e la iha serteza, tan ne'e ita labele demora bainhira hetan oportunidade atu fila fali ba Maromak. 

Isaias 55:6 hanorin ita lia-loos ne'ebé importante: seidauk tarde atu fila fali ba Maromak nia hanorin. La prekupa sala saida mak ita halo ona, la prekupa atu la'o dook loos ona hosi Maromak, Maromak sei nafatin konvida ita atu buka no bolu Nia naran. Ohin loron mak tempu ne'ebé loos atu fila fali, tanba Maromak Nia laran-sadi'a sei besik. No bainhira ita la'o iha Ninia grasa no laran-di'ak, ita bele hanoin-hetan katak tuir Nia dalan mak sei lori ita nafatin la'o iha dalan ba lalehan.

                                   Isaias 55:6

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏