Iha versu anteriór hosi Marco 9, ita lee katak, bainhira Na'i Jesus, Pedro, Tiago no João tun hosi foho, sira haree ema lubun boot no Nia husu ema-lubun neʼe: “Imi haksesuk malu ho sira kona-ba saida?” Ema ida husi ema-lubun hatán: “Mestre, haʼu lori haʼu-nia oan-mane ba Ita tanba demonia halo nia monok. Marco 9:16-17
Tan ne'e, ema ne'e lori nia oan mai Na'i Jesus nia dixípulu sira atu Kura, maibé sira la konsege kura. Dixípulu sira husu ba Na'i Jesus "Tanbasá mak ami labele duni sai demonia neʼe?” Marco 9:28 no Nia hatán ba sira: “Ho orasaun deʼit mak bele duni sai demonia tipu ida neʼe.” Mark 9:29
Iha Mateus 17:20 Na'i Jesus esplika katak dixípulu sira labele kura tanba sira la iha fé ne'ebé sufisiente. Orasaun no fé hanesan buat rua ne'ebé interligadu. Fé mak bele halo ita ko'alia hó Maromak, atu hatete ba Nia kona-ba ita nia presiza no atu espresa oinsá ita depende ba Nia de'it.
Orasaun sei la transforma Maromak, orasaun transforma ita. Orasaun sei la hatún Maromak mai ita, maibé orasaun lori ita sa'e ba Maromak. iha kazu Ida ne'e, dixípulu sira espera atu halo kurativu uza forsa Maromak nian, ita presiza orasaun atu mantein no haforsa ita nia relasaun hó Maromak. Fé so bele iha, bainhira ita iha relasaun hó Maromak. Ita labele halo buat Ida atu la'o tuir Na'i Jesus se ita la mantein ligasaun hó Na'i Jesus.
Na'i Jesus hatete "Haʼu mak uvas-hun, no imi mak sanak sira. Ema neʼebé hela nafatin hamutuk ho haʼu, no haʼu hamutuk ho nia, ema neʼe fó fuan barak, tanba se imi ketak husi haʼu imi labele halo buat ida. João 15:5
Na'i Jesus afirma iha ne'e katak iha tipu Demonia oinoin hó karater ne'ebé diferente, maibé Na'i Jesus la esplika detallu.
Iha Daniel 10 no Marco 5:10 indikasaun katak Demonia balu ezisti iha teritoriu balu de'it. Labarik mane ne'ebé monok no diuk hatudu katak Demonia iha efeitu balu ne'ebé diferente. Naran Anju aat ka Demonia ne'ebé ita lee iha bíblia mak hanesan: Lucifer (Isaias 14:12–18), no Beelzebub/Beelzebul (Marco 3:22). Ita mós rona "Legion" maibé Legion ne'e hanaran hanesan ne'e tanba iha grupu Demonia (Mark 5:9). Naran seluk ne'ebé ita lee iha Apokalipse 9:11 mak Abaddon ka Apollyon.
Mai ita halo orasaun nafatin atu mantein relasaun hó Aman Maromak.
Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan
 |
| Marco 9:28-29 |
0 comments:
Post a Comment