Pedro, hafoin esperiensia milagre Na'i Jesus nian liuhosi kaer ikan ne'ebé barak, Pedro rekoñese katak nia ema pekadór alias ema maksalak (Lukas 5:8). Hafoin, Na'i Jesus hatete ba nia ...tuir Ha'u no Ha'u sei halo ó peska ema” Mateus 4:19. Pedro sai ema dahuluk ne'ebé la'o tuir Na'i Jesus.
Bainhira Na'i Jesus la'o iha bee leten, so Pedro mak ema ida ne'ebé sai hosi vero la'o ba hasoru Na'i Jesus (Mateus 14:29). Pedro, ema ida ne'ebé iha entuasismu, forsa no hanesan Apostolu ne'ebé vokál. Mesmu nune'e nia mós iha faillansu iha nia moris. Mesmu nune'e, Na'i Jesus sei nafatin hili Nia no kontinua forma nia sai ema ida ne'ebé Nia hakarak. Lisaun mai ita mak, karik ita failla ka sidi iha ita nia moris, hamriik fali no kontinua la'o buka Maromak.
Pedro gaba an no hatete "Maski ema seluk hotu sidi tanba buat neʼebé akontese ba Ita, maibé haʼu sei nunka sidi!” Mateus 26:33. Bainhira ema konfronta nia iha momentu ema julga Na'i Jesus, nia nega katak nia lahatene Na'i Jesus (Mateus 26:74). Maibé, bainhira Pedro hanoin Na'i Jesus Nia liafuan no la'o sai no tanis tristi los (Mateus 26:75).
Hafoin Na'i Jesus moris hi'as, Simão Pedro fila fali ba nia serbisu uluk, hanesan peskadór. Maibé, Na'i Jesus mosu fali ba nia no repete milagre kaer ikan barak no fó han nia ho domin (João 21). Hafoin Na'i Jesus husu Pedro “Simão, João nia oan, ó hadomi haʼu liu fali sira-neʼe ka lae?” Nia hatán: “Loos, Naʼi, Ita hatene katak haʼu hadomi Ita.” Jesus dehan ba nia: “Fó-han ba haʼu-nia bibi-oan sira. João 21:15. Na'i Jesus husu Pedro dala tolu no halo nia kompriende konfirmasaun kona-ba obra ne'ebé nia tenke halo atu tau matan ba Na'i Maromak Nia bibi sira. Pedro sai lider ida ne'ebé boot no halo milagre boot hodi Na'i Jesus Nia naran.
Na'i Jesus perdua no restaura Pedro no haruka nia hala'o nia serbisu Na'i Maromak nian liuhosi haklaken Na'i Nia futarlia. Nune'e mós ita, bainhira ita ho onestu simu ita nia frakeza no husu Na'i Nia forsa, Na'i Maromak ne'e fiél no sei perdua ita nia sala hotu no restsura ita ho moris foun iha familia Na'i Maromak nian.
✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
 |
| João 21.15 |
0 comments:
Post a Comment