Bonita ne'ebé dura

Laran midar bele bosok no oin bonita mak saugati deit, maibee feto nebee hamtauk ba Nai sei simu liafuan nebee hasae nia. Provérbiu 31:30 BK

Versíkulu ne'e fó-hanoin ita katak buat ne'ebé mundu bolu nu'udar "Bonita" la dura ba nafatin. Tanbasá ? Tamba Ita-nia kulit sei sai namkurut, no ita-nia fuuk sei sai mutin, no ita-nia isin sei sai ferik-katuas. Ema barak gasta tempu no osan barak tebes atu haree joven no atrativu, maibé Biblia hatete katak furak ka Bonita sira hanesan ne'e sei lakon. Charm ne'ebé ita tradus oin- midar (abilidade atu atrai ema) mós bele lohi ema seluk. Ema ida bele haree di'ak hosi li'ur, maibé Iha laran bele nakonu ho hanoin an de'it ka la hatudu hahalok-di'ak. 

Maromak hakarak ita fokus kona-ba Bonita ne'ebé diferente hosi mundu nia haree. Bonita ne'ebé maihosi hamta'uk ba Maromak. "Hamta'uk Nai" la signifika katak ita ta'uk ba Nia. Hamta'uk Maromak signifika katak ita respeitu Nia, halo tuir Nia hanorin sira iha Sagrada ESKRITURA, no hadomi Nia ho ita-nia laran tomak. Bonita hanesan ne'e sai hosi ita-nia laran. Bonita hanesan ne'e hatudu liuhosi: oinsá ita trata ema seluk, oinsá ita ko'alia ba ema, oinsá ita-nia hahalok moris loronloron. 

Feto ida (no mós mane) ne'ebé hamta'uk Nai mak folin-boot liu iha Maromak nia oin. Bonita Ida hanesan ne'e sei nunka lakon tanba Ida ne'e maihosi Maromak rasik. Ema sei respeitu no hahi'i ba ema ne'ebé moris hanesan ne'e, la'ós tanba sira-nia oin bonita, maibé tanba sira-nia karakter ka hahalok di'ak sira. 

Mai ita la uza ita-nia enerjia, osan no rekursu hotu atu sai bonita hosi li'ur. Maibé, mai ita haburas ita-nia laran ne'ebé hadomi Maromak, hatudu laran-di'ak, no la'o tuir lia-loos hosi Sagrada ESKRITURA. Bonita hanesan ne'e mak sei dura ka ezisti ba nafatin to'o eternidade.

Orasaun: Nai, ajuda ami atu hafolin liu bonita ne'ebé maihosi hadomi no halo tuir Maromak Nia lia-loos. Halo ami-nia laran nabilan ho laran-di'ak, haraik-an no fé. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏