Maromak nia domin boot liu ita-nia pekadu

Maibee Maromak hatudu Ninia domin ba ita ho ida nee: Bainhira ita sala nain hela, Kristu mate tanba ita. Roma 5:8 BK

Roma 5:8

Versíkulu ne'e hatudu katak Maromak nia domin mak kle'an tebes. Bíblia hatete katak bainhira ita ema sala-na'in hela (la obedese ba Ninia ukun-fuan sira), Nia nafatin hili atu hadomi ita. Nia la hein ita atu sai perfeitu lai ka to'o ita hadi'a ita-nia sala sira. Duke halo nune'e, nia haruka Ninia Oan-Mane, Jesus Kristu mai mate ba ita. Ida ne'e mak aktu domin boot liu hotu. 

Roma 5 nia kontestu mak kona-ba oinsá Maromak halo ema iha relasaun di'ak fila fali ho Nia. Ita hotu halo ona sala (Roma 3:23), no rezultadu hosi sala mak mate (Roma 6:23). Maibé Maromak la husik ita iha situasaun ne'ebé la iha esperansa. Maski ita la merese, Maromak haruka Jesus mai no foti ita-nia kastigu ba ita-nia pekadu sira. 

Ida-ne'e hatudu katak Maromak Nia domin la bazeia ba ita-nia hahalok-di'ak sira. Maibé ida-ne'e bazeia ba Maromak Nia domin, laran-di'ak no laran-sadi'a. Jesus mate ba ita bainhira ita sei dook hela husi Maromak. Ida ne'e signifika katak, bainhira ita arepende no konfesa ita sala ona, la iha pekadu ida ne'ebé ita halo ona ne'ebé Maromak la bele fó perdua (1João 1:9). 

Kuandu ita sente moe ka sente la merese, hanoin ida-ne'e: Jesus mate tanba ita ho situasaun ka realidade ne'ebé ita iha (pekador). Ita la sosa Maromak Nia domin, maibé Maromak fo ona domin ne'e ba ita liuhosi sakrifisiu Na'i Jesus nian. Buat ne'ebé ita presiza halo mak ne'e : simu no tau fiar ba Jesus. 

Orasaun: Obrigadu Maromak, tanba hadomi ona ami maski ami dook husi Ita. Obrigadu, haruka ona Jesus mai mate tanba ami-nia sala sira. Ajuda ami atu moris ba Ita no fahe Ita-nia domin ba ema seluk. Amen.

Roma 5:8

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏