Perdua atu hetan perdua

Bainhira mak tempu di'ak atu perdua? Serake ita perdua ema, bainhira ema ne'ebé halo sala ba ita muda ona sira-nia hahalok? Ka ita tenke perdua mesmuke sira seidauk muda sira-nia hahalok? Mai ita haree saida mak Maromak Ninia lia-fuan ko'alia.

Tanba se imi foo perdua ba ema sira nebee halo sala, imi nia Aman iha lalehan mos sei foo perdua ba imi. Maibee se imi la foo perdua ba ema sira nebee halo sala, imi nia Aman mos sei la foo perdua ba imi nia sala. Mateus 6:14-15 BK

Mateus 6:14-15

Perdua ne'e importante tebes iha ema kristaun nia moris. Maromak hakarak ita fó perdua tanba nia fó perdua uluk ba ita ona. Iha Efeso 4:32, Biblia hatete: "Hatudu laran diak ba malu, no laran luak. Foo perdua ba malu, hanesan mos Maromak foo ona perdua ba imi iha Kristu. Efezu 4:32 BK. Ida-ne'e signifika katak ita la fó perdua ba ema tanba ema merese atu simu perdua, maibé ita fo perdua tanba Maromak fó perdua ona ba ita liuhusi Na'i Jesus Ninia sakrifisiu iha foho kalvariu. 

Dala ruma ema ne'ebé hakanek ita-nia laran, la husu deskulpa ka la muda sira-nia hahalok. Maibé se ita hein ema-sira ne'ebé hakanek ita-nia laran muda hahalok ka arepende, ita bele rai hirus iha ita-nia laran ba tempu naruk. No hirus ne'e bele halo ita la kontente no bele impede ita-nia orasaun. Jesus hanorin iha Marcos 11:25 katak "No bainhira imi hamriik hodi halo orasaun, foo perdua ba, se imi iha buat ruma nebee hasoru ema seluk. Nunee mos imi nia Aman iha lalehan bele foo perdua ba imi kona ba imi nia sala" Marcos 11:25

Perdua la signifika katak ita konkorda ho sala ne'ebé sira halo ka haluha buat ne'ebé akontese. Maibé ida ne'e signifika katak ita hili atu husik tiha problema ne'e no intrega ba Maromak nia liman. Roma 12: 19 hatete: ".... keta selu fali aat ba ema seluk, maibee husik buat nee ba Maromak nia laran hirus. Tanba hakerek nanis ona, “Vingansa mak Hau nian, no Hau sei selu fali, dehan Nai.” Kuandu ita fó perdua, ita tau fiar ba Maromak atu tau matan ba ema ne'e iha ninia dalan no tempu rasik. 

Jesus rasik hatudu ezemplu di'ak liu hotu mai ita. Iha kruz leten Nia halo orasaun “Aman, foo perdua ba sira, tanba sira la hatene buat nebee sira halo.” Lucas 23:34. Ema sira ne'ebé hakanek, insulta, tafui no baku Nia seidauk arepende, maibé Jesus fó perdua nafatin. 

Tan ne'e, ita fó perdua, la'ós tanba ema perfeitu, maibé tanba Maromak hatudu laran-sadi'a ba ita. Perdua lori dame ba ita-nia laran no hametin ita-nia relasaun ho Maromak.

Mateus 6:14-15

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏