Hamriik no sai naroman ba!

Hamriik no leno ba, tanba ita nia naroman mai ona, no Nai Nia glória sae ona no leno ba ita. Isaias 60:1 BK

Isaias 60:1

Antes versíkulu ne'e, iha Isaias 59: 9-10 esplika kona-ba ema ne'ebé moris iha nakukun laran. Sira hanesan ema matan-delek ne'ebé la'o la ho naroman. Sira hein naroman, maibé sira hetan de'it mak nakukun tanba sira-nia pekadu. Ida-ne'e hatudu katak se la iha Maromak, moris mak hanesan kalan - ne'ebé halo ema konfuzaun, perigu, no la iha esperansa. 

Maibé Isaias 60: 1 lori mudansa boot. Maromak Nia naroman mai ona! Naroman ne'e mak Ninia glória - Ninia prezensa, Ninia lia-loos, no Ninia salvasaun. Bainhira Maromak fó naroman ba ita, pekadu nia nakukun, ta'uk, no triste tenke lakon. Ninia naroman fó esperansa, matadalan no ksolok ba ita. 

Na'i Jesus hatete iha Mateus 5:14: "Imi mak mundu nia naroman." Ida ne'e signifika katak kuandu ita simu Maromak Nia naroman, ita labele subar naroman ne'e. Hanesan loro-matan mosu hodi fo naroman ba mundu tomak, ita mós tenke husik Maromak Nia naroman fo roman ba ema seluk. Ita sai naroman liuhosi moris ho laran-di'ak, ko'alia lia-loos Maromak nian, ajuda ema seluk, no fahe evanjelu kona-ba Jesus. 

Karik agora ita-nia moris sente nakukun: tamba nakonu ho problema, sala, ka triste. Maibé ohin Maromak bolu ita hodi dehan: "Hadér!" Ne'e signifika katak hamriik hosi situasaun ne'ebé la iha esperansa. "Sai naroman!" Ne'e signifika husik Maromak Ninia domin no lia-loos hatudu iha ita-nia moris loronloron. 

Kuandu ita moris iha Maromak Nia naroman, ita la'ós de'it haree dalan ne'ebé loos, maibé mós ajuda ema seluk atu hetan dalan ne'ebé loos. Nakukun la bele manán bainhira Maromak Nia naroman iha ita-nia laran. 

Orasaun: Nai, obrigadu tanba lori ona Ita-nia naroman mai ami-nia moris. Ajuda ami atu hamriik husi nakukun laran hodi fo naroman ba ema seluk. Uza ami atu fó matadalan ba ema seluk kona-ba Ita-nia domin. Amen.

Isaias 60:1

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏