Sanak hotu iha Ha'u ne'ebé la fó fuan, Nia hasai tiha. No sanak hotu ne'ebé fó fuan, Nia hamoos hodi bele fó fuan liu tan. João 15:2 BK
Iha Evanjellu João 15: 2 , Jesus hatete katak sanak hotu ne'ebé fó fuan, Nia sei aparu atu bele fó fuan barak liután. Jesus uza imajen kona-ba uvas-hun no sanak sira atu esplika kona-ba ita-nia relasaun ho Nia. Maromak hanesan toos-nain ida-ne'ebé tau matan ba Ninia ai-horis sira ho domin.
Maibé saida mak signifikativu hosi aparu sanak sira iha realidade moris nian?
Aparu mak bainhira toos-nain ida hasai ka tesi tiha ramu sira ne'ebé la saudavel ka la nesesáriu atu nune'e ai-horis refere bele sai forte liután no fó fuan barak liután. Espiritualmente, dala ruma Maromak hasai ka aparu buat ruma husi ita-nia moris ne'ebé hafraku ita-nia relasaun ho Nia.
Dala ruma Maromak aparu ita-nia toman aat, hahalok sala-na'in, foti-an, hirus, hanoin an de'it, ka dezezu pekadu nian. Dala ruma mós, Maromak bele husik ita esperiénsia susar sira atu transforma ita-nia karakter, atu sadere liután ba Nia.
Aparu iha ita-nia moris ne'e halo ita sente moras. Karik ita lakon ita-nia komfortu, lakon ita-nia relasaun di'ak, ita-nia planu, ka distraksaun ne'ebé halo ita dook husi Maromak. Dala ruma ita la komprende tanbasá mak Maromak husik susar balu kona ita. Maibé hanesan toos nain ne'ebé aparu uvas ho kuidadu, Maromak mós serbisu iha ita-nia moris ho matenek no domin.
Iha realidade moris nian, aparu bele akontese bainhira:
1. Maromak hasé ita kona-ba hahalok sala ruma.
2. Ita hasoru susar ruma atu ita aprende kona-ba pasiénsia no fiar.
3. Maromak hasees tiha buat sira ne'ebé foti ita-nia tempu no atensaun tomak ne'ebé halo ita haluha Maromak.
4. Ita aprende oinsá haraik-an kuandu ita falla.
5. Liuhusi susar sira, ita bele aprende atu sai ema ne'ebé hatudu domin, fó perdua, no sai maduru liután iha vida espirituál.
Maromak la aparu ita atu fo perigu ba ita. Nia aparu ita atu ita bele krexe espiritualmente no fó fuan espíritu nian hanesan: domin, ksolok, dame, pasiénsia, laran-di'ak, no kontrola an.
Jesus hakarak ita atu nafatin iha ligasaun ho Nia. Sanak ne'ebé haketak an hosi uvas hun la bele moris. Nune'e mós iha ita-niamoris, ita presiza halo orasaun loroloron, estuda Biblia, no halo tuir Maromak Nia matadalan hodi bele nafatin saudavél espiritualmente.
Kuandu Maromak tesi ka halakon buat-aat sira iha ita-nia moris, ida-ne'e bele halo ita laran-kanek iha tempu balu, maibé ida-ne'e bele hametin ita-nia fiar no halo ita besik liután ba Maromak. Bainhira Maromak aparu, Ninia objetivu mak la'ós atu fó kastigu maibé atu ita bele krexe espiritualmente.
Tan ne'e, kuandu ita liuhusi susar ruma bainhira Maromak halo koresaun, fó dixiplina, ka hasoru tempu susar ruma, hanoin ba katak Maromak aparu hela ita ba ojetivu ne'ebé boot liután iha ita-nia moris. Tau fiar ba Ninia liman ne'ebé nakonu ho domin.
Bainhira ita nafatin iha relasaun di'ak ho Kristu no husik Maromak transforma ita-nia moris, ita bele krexe espiritualmente no kontinua la'o iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment