Fraze "leba kruz" enjerál signifika simu difikuldade ka todan ne'ebé ita hasoru iha ita nia moris. Maibé leba kruz nia signifika liu fali definisaun ne'e. Ema hotu-hotu atu Kristaun ka lae, sei esperiensia frustradu, terus no moras oinoin iha sira nia moris. Leba kruz hodi tuir Na'i Jesus ne'e buat ne'ebé kompletamente diferente.
Ai-kruz hanesan instrumentu ba mate nian. Na'i Jesus refere espresaun ida ne'e ba komitmentu no obedese ba Nia no Ninia hanorin, mesmu tenke hasoru mate. Mate iha kruz la'os buat ne'ebé di'ak. Esperiensia iha kruz mak moras, terus no moe. Nia implikasaun mak mesmu obedese ba Na'i ne'e todan no moe ita tenke tahan tanba Kristu.
Bainhira, Na'i Jesus hatete " leba ó nia kruz hodi tuir haʼu" Na'i Jesus fó ba ita konseitu "mate ba an/self death" ne'ebé relasiona hó Na'i Jesus Nia liafuan ne'ebé hatete "Tanba ema neʼebé hakarak salva ninia moris sei lakon ninia moris, maibé ema neʼebé lakon ninia moris tanba haʼu sei salva ninia moris. Buat diʼak saida mak ema ida hetan se nia manán mundu tomak maibé lakon ninia moris?" Lukas 9:25-26
Versu ne'e hanorin mai ita katak la iha buat ida iha ita nia moris mak inportante liu moris Rohan-laek. Ita tenke opta moris-rohan laek mesmu ida ne'e halo ita tenke lakon serbisu, familia, kolega, grupu no ita nia identidade. Xamada ida ne'e todan maibé kompara hó terus ne'ebé temporariu iha mundu, nia kolen merese duni, mak moris rohan-laek
Ema barak ne'ebé la'o tuir Na'i Jesus hanoin katak Na'i Jesus sei lori liberdade hosi podér Romanu nian. Ninia dixípulu sira mós hanoin hanesan ne'e (Lukas 19:11). Tanba la kompriende profesia, sira hakfodak bainhira Na'i Jesus komesa ko'alia kona-ba mate, nega an no leba kruz (Lukas 9:22). Ema barak husik hela Nia tanba dutrina ne'e. Nune'e mós fiar na'in sira ohin loron iha mundu modernu ne'e hanoin katak Na'i Jesus bolu ita ba saúde, rikusoin, no prosperiadade. Maibé, Na'i Jesus Nia xamada mak xamada atu simu terus oinoin atu hetan moris Rohan-laek.
Na'i Jesus nunka garantia moris ne'ebé di'ak hela de'it. Enves Na'i Jesus hatete: sei iha susar ba ema ne'ebé tuir Nia (João 16:33). La'o tuir Na'i Jesus presiza sakrifisiu. Na'i Jesus promete katak Nia sei hamutuk hó ita bainhira ita hasoru susar sira ne'e atu ita bele iha pas no ksolok (João 14:15-19), fó hakmatek ba ita iha susar nia laran (Tiago 1:12), Na'i Jesus mós serbí hanesan saserdote boot ne'ebé kompriende ita nia luta moris nian (Ebreu 2:17) no halo rekonsiliasaun entre ita hó Maromak liuhosi Nia raan (Roma 5:1).
La fasíl atu leba kruz hodi la'o tuir Na'i Jesus. Mai ita husu ita nia an:
• Seráke, ha'u sei tuir Na'i Jesus Nia hanorin nafatin, mesmu ha'u tenke lakon kolega di'ak?
• Seráke, ha'u sei tuir Na'i Jesus Nia hanorin nafatin, mesmu ha'u tenke sai hosi ha'u nia familia
• Seráke, ha'u sei tuir Na'i Jesus Nia hanorin nafatin, mesmu ha'u tenke lakon reputasi?
• Seráke, ha'u sei tuir Na'i Jesus Nia hanorin nafatin, mesmu ha'u tenke lakon kargo ka serbisu?
• Seráke, ha'u sei tuir Na'i Jesus Nia hanorin nafatin, mesmu ha'u tenke lakon ha'u nia moris?
Iha fatin balu iha mundu, konsekuensia tuir Na'i Jesus mak mate, maibé iha fatin seluk konsekuensia diferente hanesan presegisaun etc. Mesmu tuir Na'i Jesus, la sempre halo ita mate fizikamente, ita tenke prontu hasoru mate ka terus duké nega Nia. Iha situasaun balu, iha ne'ebé ita tenke opta Na'i Jesus ka buat haksolok mundu nian. Opsaun ida ne'ebé mak ita hili determina kualidade ita nia domin ba Na'i Jesus.
Leba kruz hodi tuir Na'i Jesus signifika foti komitmentu atu tuir Na'i Jesus no rende ita nia esperansa, mehi, rikusoin, no ita nia moris karik presiza. Ida ne'e mak atitude ne'ebé loloos hanesan dixípulu Na'i Jesus nian ne'ebé loos (Lukas 14:27). Na'i Jesus fó ezemplu ba ita liuhosi Nia mate atu fó ba ita prezente moris nian "Tanba ema neʼebé hakarak salva ninia moris sei lakon ninia moris, maibé ema neʼebé lakon ninia moris tanba haʼu sei hetan fali ninia moris. (Mateus 16:25).
✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
 |
| Mateus 16:24 |
0 comments:
Post a Comment