Seraké iha ita-nia moris, ita hasoru ema ruma ne'ebé sempre kontra buat ne'ebé loos? Ba ema ne'e buat hotu ne'ebé ema seluk halo nunka loos no ita husu pergunta, seraké ema hanesan ne'e bele muda? Iha ita-nia leitura ohin loron, ita haree katak, ema ne'ebé laran toos halo nusa mós bele muda.
Atu sai ema Judeu signifika tenke sunat fizikamente. Labarik mane tenke halo sirkunsizaun ka sunat iha loron da-8 hafoin moris. Maibé iha Bíblia, sunat fiziku simboliza sirkunsizaun laran. sirkunsizaun katak ko'a ka tesi. Ita tenke ko'a ka tesi hahalok hotu ne'ebé kontra Maromak Ninia ukun-fuan. Ita tenke ko'a hahalok ulun toos. Ko'a hanoin aat hotu nune'e ita-nia laran mós.
Iha Apostolu 7 ita lee katak iha Rohan hosi Estevão ninia ko'alia, nia ko'alia ho brani no lian maka'as, "Imi ema ulun toos no ema nebee la halo sirkunsizaun ba fuan laran no tilun. Imi sempre kontra Espíritu Santu. Hanesan imi nia bei-ala sira halo, nunee mos imi halo" Apostolu 7:51. Nia depois akuza sira mak oho Jesus (Ema ne'ebé loos) (Apostolu 7:52).
Tema seluk ida ne'ebé Estevão toka iha ninia ko'alia mak "Maromak la hela iha uma sira nebee ema nia liman mak halo, hanesan profeta dehan nanis ona" Apostolu 7:48. Tabernákulu (Apostolu 7:44-45), nomós templu (Apostolu 7:46-47) literalmente labele haree hanesan fatin Maromak nian (Apostolu 7:48). Hanesan Maromak ko'alia liuhosi profeta Isaias "Lalehan mak Hau nia kadunan, no mundu mak fatin nebee Hau tau Hau nia ain. Imi sei halo uma saida ba Hau? hatete Nai, ka Hau sei deskansa iha fatin nebee? Apostolu 7:49. Jesus mai atu troka Tabernacle ka tabernákulu no templu. Molok Jesus mai ema ba templu atu hasoru Maromak. Maibé bainhira Jesus mai ona, fatin hasoru Maromak mak Jesus rasik.
Agora liuhosi Espíritu Santu, Maromak Ninia presenza horik ho ita ema. Maromak Ninia prezensa liuliu iha kongregasaun ka igreja (Ef. 2:22). Liuhosi Ninia Espíritu, Maromak hela ho ita ida-idak. Ita-nia isin mak templu Maromak nian (1Kor. 6:29). Espíritu Santu sempre fo hanoin ita, bainhira ita halo sala atu fila ba Maromak, atu kumpri Ninia ukun-fuan sira. Mai ita halo sirkunsizaun ba ita-nia fuan laran.
Referensia: Apostolu 7:44-60, 8:3, Ef 2:22, 1Kor 6:19
✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment