Purgatoriu

Antes kontinua, ha'u hakarak hatete katak diskusaun ida ne'e la intende atu ofende ema ida. Ida ne'e puramente analiza bazeia-ba Referensia sira ne'ebé sitadu.

Dutrina kona-ba purgatoriu la iha Bíblia, maibé ida ne'e hanesan dutrina ka hanorin igreja nian. Igreja hanorin katak klamar sira ne'ebé la merese ba infernu maibé seidauk prontu ba paraizu ka Lalehan sira ba uluk purgatoriu atu nune'e sira nia pekadu bele "purge" ka bele hasai ka hamoos no depois mak sa'e ba lalehan. Sofrementu ka terus hosi klamar sira iha purgatoriu bele hamenus liuhosi orasaun no penitensia hosi familia mate-bian nian.

Tuir mai, ita haree hamutuk saida mak igreja ninia hanorin ne'ebé hakerek iha katekismu:

1. "sira ne'ebé mate iha Maromak ninia grasa, maibé seidauk hetan purifikasaun perfeitu sira-nia moris rohan-laek aseguradu, maibé depoisde mate sira sei liuhosi prosesu purifikasaun atu hetan santifikasaun (holiness) nesesariu atu tama ba ksolok lalehan" 

2. Iha katekismu ne'e mós hatete katak, klamar sira-nia sofrementu bele alevia ka bele hamenus liuhosi orasaun hosi familia mate-bian nian no hahalok sira seluk inomede (atas nama) mate-bian. Igreja mós rekomenda familia mate-bian fo esmola, halo induljénsia no peniténsia inomede mate-bian —Catechism of the Catholic Church (New York: Doubleday, 1995), p. 291.

Relasiona ho dutrina iha leten, mai ita haree saida mak Bíblia hanorin. Konsidera versikulu sira tuir mai:

1. Buat saida deit nebee o nia liman hetan hodi halo, halo ba ho o nia kbiit. Tanba la iha servisu, ka planu, ka konhesimentu, ka matenek klean iha rate, iha fatin nebee o atu baa. Eklesiastes/Pengkotbah 9:10 BK 

2. Klamar ida nebee sala mak mate. Oan mane sei la simu todan tanba ninia aman nia hahalok aat. No aman sei la simu todan tanba ninia oan mane nia hahalok aat. Moris loos hosi ema moris loos mak hela ho nia rasik, no hahalok aat hosi ema aat mak hela ho nia rasik. 21 “Maibee se ema aat fila hosi ninia sala sira nebee nia halao no nia halo tuir Hau nia estatutu hotu no nia halo buat nebee justu no loos, tebes nia bele moris hela; nia sei la mate. 22 Hau sei la hanoin hetan ninia sala kontra nian nebee nia halo tiha ona hodi hasoru nia. Nia bele moris hela tanba ninia hahalok loos nebee nia halo ona nee. Ezekiel 18:20-22 BK 

3. Ema tenki mate dala ida, depois sira hetan julgamentu. Ebreu 9:27

 Hafoin lee tiha versikulu sira iha leten, kompara to'ok ho dutrina purgatoriu oinsá?

Dogma ka dutrina purgatoriu kombina nosaun ka konseitu fiar Jentiu sira nian kona-ba ahi infernu ho pratika orasaun ba ema mate (mate-bian). Hanorin ida ne'e kontrariu ho Maromak ninia lia-fuan iha Bíblia. Tambasá?

1. Bíblia hanorin katak ema mate deskansa no lahatene buat ida (Unconscious) iha rate laran (Ecclesiastes 9:10).

2. Hahalok loos hosi ema ida labele transfer ba ema seluk (Ezek. 18:20-22)

3. Mediadór entre ema ho Maromak ida de'it (1Tim. 2:5)

4. Bainhira ema mate tuir mai julgamentu la iha oportunidade daruak atu arepende ba saida de'it mak ita halo ona durante ita-nia moris (Ebreu 9:27)

.

Referensia

The Saints In Purgatory - https://beta-sabbath-school.web.app/lesson/2022-11-29/

Catechism of the Catholic Church (New York: Doubleday, 1995), p. 291.

Ezekiel 18:20-22

Ecclesiastes 9:10

1 Timotéo 2:5

✝️✝️✝️✝️✝️✝️✝️✝️✝️✝️✝️✝️

Agora ita rona ona Maromak Nia futarlia, no Maromak dehan nune'e: 

Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16

Maromak mós hatete nune'e:

Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?

Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12

Maromak akonpaña ita hotu nia moris ohin loron no ba oin.

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏