Keta haluha atu halo diak no atu fahe buat nebee ita iha. Tanba Maromak kontenti kona ba sakrifísiu hanesan nee. Ebreu 13:16 BK
Serake Ita hanoin ona kona-ba oinsá mak Ita-nia moris bele fo ksolok ba Maromak? Iha Eskritura laran tomak, ita aprende oinsá mak ita bele uza ita-nia moris hodi halo Maromak kontente. Tuir loloos, Maromak kria ita atu halo nia kontente.
Tanba ita hetan ona moris foun iha Kristu, no ita hetan ona Maromak nia grasa, ita presiza halo Maromak kontente. Tanba Maromak fó ona buat hotu iha ita-nia moris, ita tenke fó buat hotu ne'ebé ita iha ba Nia.
Autór Ebreu hatete katak iha dalan rua mak ita bele halo hodi halo Maromak kontente. Primeiru mak iha Ebreu 13:15 "Nunee liu hosi Nia, mai ita oferese nafatin sakrifísiu nebee hahii Maromak, nebee liafuan hosi ibun nebee foo sai Ninia naran"
Hakerek-nain ne'e hatete katak ita-nia sakrifísiu primeiru ba Maromak mak atu hahi'i nia. Ida ne'e mak bíblia bolu nu'udar "hahi/adorasaun".
Adorasaun mak orientasaun ita-nia moris tomak ba Maromak tamba buat hotu ne'ebé Nia halo ona ba ita. Ita bele adora Maromak la'ós de'it liuhusi knananuk sira ne'ebé ita kanta, maibé mós liuhusi oinsá hala'o ita-nia moris loronloron.
Ebreu 13: 16 hatete ba ita dalan seluk tan atu halo Maromak kontente: liuhosi hadomi ema seluk. Kuandu ita hadomi ema seluk, ita hatudu domin ne'ebé Maromak iha ba sira. Tan ne'e mak importante atu haree oinsa ita trata ema seluk iha ita-nia moris loronloron.
Ita-nia asaun sira sai hanesan reflesaun kona-ba oinsá Maromak hadomi ona ita. No tanba Maromak hadomi ona ita, ita tenke halo buat di'ak ba ema sira ne'ebé hale'u ita.
Dalan rua ne'e mak ita bele halo hodi fó ksolok ba Maromak: liuhusi adora Maromak no hadomi ema seluk. Ida-ne'e hanesan ho buat ne'ebé Jesus hatete iha Mateus 22:36-40.
"Mestri, ukun fuan ida nebee mak boot liu iha Lei?” Jesus dehan ba nia, “‘O sei hadomi Nai, o nia Maromak, ho o nia laran tomak, o nia klamar tomak, no o nia neon tomak.’ Ida nee mak ukun fuan uluk liu no boot liu. No ida segundu mak hanesan ida nee, ‘O sei hadomi o nia maluk hanesan o nia aan rasik.’ Lei no Profeta sira hotu nia huun mak ukun fuan rua nee”Mateus 22:36-40 BK
Nia halo sumariu ida katak ita tenke hadomi Maromak no hadomi ema seluk. Ita hadomi Maromak liuhusi adora Nia no hahi'i Nia. Ita hadomi ema seluk liuhusi hatudu hahalok-di'ak ba sira no fahe buat ne'eba ita iha ho sira.
Oinsá mak Ita hatudu domin ba Maromak no hadomi ema seluk? Serake ita gasta tempu loroloron iha Eskritura no orasaun hodi hahi'i Maromak? Se ita la hadomi uluk Maromak, ita la bele hadomi mós ema seluk iha ita-nia moris.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
0 comments:
Post a Comment