Dehan bá maibé la bá

Imi hanoin oinsá? Mane ida iha oan naʼin-rua. Nia hakbesik ba ida dahuluk no dehan: ‘Oan, ohin ó bá hodi halo serbisu iha toʼos-uvas.’ Oan neʼe hatán: ‘Haʼu lakohi bá’, maibé depois neʼe, nia arrepende an no nia bá. Nia hakbesik ba oan ida seluk no hatete buat neʼebé hanesan. Oan neʼe hatán: ‘Haʼu sei bá, apá.’ Maibé nia la bá.  Husi oan naʼin-rua neʼe, ida-neʼebé mak halo ninia aman nia hakarak?” Sira hatete: “Ida dahuluk.” Jesus dehan ba sira: “Haʼu hatete loloos ba imi katak, kobradór impostu no feto-aat  sira sei tama uluk liu imi iha Maromak nia Reiñu. Mateus 21:28-31

Oan na'in rua- reprezenta Hahalok ema Judeu nian no ema Kobradór impostu sira, ema maksalak sira hanesan ita.

Iha Hau Nia to'os uvas - Atu serbisu iha to'os uvas reprezenta obra ka serbisu ne'ebé Maromak rekere ka husu ita atu halo.

Oan dahuluk hatete "Hau sei la bá" - Ida ne'e linguajen ema aat sira ka ema maksalak sira . Sira rejeita no la gosta atu halo tuir Na'i Maromak Nia hakarak. Maibé depois sira Arepende - Muda sira nia hanoin. Hafoin rona João Batista hanorin, ema Kobradór impostu sira, ema aat sira, sira arepende hosi sira Nia Hahalok Sala no obedese ba Maromak.

Oan daruak hatete "Ha'u bá, maibé la bá" - Ida ne'e reprezenta Hahalok ema Farizeu no Eskriba sira - sira hatete katak sira obedese ba Maromak so iha ibun de'it maibé realidade sira hatudu sira nia fiar iha li'ur de'it no sira hakarak Na'i Jesus mate.

Entre oan rua ne'e, Ida ne'ebé mak halo tuir sira nia aman nia hakarak? Sira hatán, ida oan dahuluk, no Na'i Jesus hatán loos duni.

Lisaun mai ita: Ita bele hatene Lia Loos hotu, maibé la halo tuir saida mak Maromak nia futarlia haruka, ita sei sai hanesan oan daruak ne'ebé hatete atu ba maibé la bá. Ita nia fiar tipu ida ne'e hanesan fiar iha ibun tutun de'it. Fiar ida hanesan ne'e fiar bosok-teen.

Maromak Nia futarlia iha 1João 2:3-4 dehan "Se ita kontinua halo tuir ninia ukun-fuan sira, neʼe katak ita hatene ona nia. Ema neʼebé dehan: “Haʼu hatene ona nia”, maibé la halo tuir ninia ukun-fuan sira, ema neʼe bosok-teen, no lia-loos la hela iha ema neʼe"

Karik ita la halo tuir ita sei la hola parte iha reiñu Lalehan "Laʼós ema hotu neʼebé dehan mai haʼu: ‘Naʼi, Naʼi’, sei tama ba Reiñu lalehan nian, maibé ema neʼebé halo tuir haʼu-nia Aman iha lalehan nia hakarak mak sei tama ba Reiñu neʼe. Iha loron neʼebá ema barak sei dehan mai haʼu: ‘Naʼi, Naʼi, ami fó sai profesia no duni sai anju aat sira, no ami mós halo milagre barak hodi Ita-Boot nia naran, loos ka lae?’ Maibé haʼu sei hatete ba sira: ‘Haʼu la hatene imi! Hadook an tiha husi haʼu, imi neʼebé la halo tuir ukunfuan sira. Mateus 7:21-23

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Mateus 7:21