Ukun fuan dahuluk to'o dahaat "regula oinsá ita hadomi Maromak" no ukunfuan dalima to'o dasanulu "regula oinsá ita hadomi ita nia maluk sira"
Tanba ne'e mak Na'i Jesus bainhira ema Farizeu sira husu kona-ba ukun fuan ne'ebé boot liu Na'i Jesus hatán "Imi tenke hadomi Na'i imi-nia Maromak, ho imi-nia laran tomak, ho imi-nia moris tomak no ho imi-nia neon tomak.’ Neʼe mak mandamentu neʼebé boot liu no primeiru. Segundu mandamentu neʼe mak: ‘Imi tenke hadomi imi-nia maluk hanesan imi-nia an rasik.’ Mateus 22:37-39
Ema balu hanorin katak Na'i Maromak Nia ukunfuan 10 la vale ona tanba Na'i Jesus halo ona ba 2 de'it, maibé Ida ne'e la loos. Loos mak ukunfuan 10 bele habadak ka agrupa ba 2 hanesan esplika ona iha leten. Hó liafuan seluk Maromak Nia ukunfuan 10 ne'e sei vigora nafatin. Tanba Na'i Jesus mai la'os atu halakon ukunfuan sira maibé atu kompleta liutan. Na'i Jesus rasik hatete "Keta hanoin katak haʼu mai atu halakon Ukun-Fuan ka Profeta sira-nia liafuan. Haʼu mai laʼós atu halakon, maibé atu kumpre. Mateus 5:17
Iha Mateus 22:37 Na'i Jesus hatán ema sira ne'ebé koko Nia liuhosi sita Deuteronomy 6:5 ne'ebé hatete nune'e "Imi tenke hadomi Na'i, imi-nia Maromak, ho imi-nia laran tomak, ho imi-nia moris tomak no ho imi-nia kbiit tomak"
Iha Evanjellu Sn Markus, Na'i Jesus hatán pergunta ne'ebé hanesan komesa hó kredo ema Israel nian “Rona bá, oh ema Izraél, Na'i ita-nia Maromak mak Na'i mesak ida deʼit"
Ida ne'e signifika katak, ita só Adora Na'i Maromak mesak ida de'it. Labele iha ema ka objetu seluk ne'ebé ita bele adora. Ema balu hatete ami uza objetu balu hanesan media de'it, maibé ami Adora ba Maromak mesak ida de'it. Biblikamente Ida ne'e kontra Maromak Nia futarlia, tanba Bíblia hatete "Tanba iha Maromak ida deʼit no iha mediadór ida entre Maromak no ema, neʼe mak, Kristu Jesus. 1Timoteo 2:5.
Hanesan ita balu, ema Farizeu sira nia hanorin ne'e kaer metin ba Lia Loos, maibé sira la aplika iha sira Nia moris. Tan ne'e Na'i Jesus dehan “Eskriba no ema Farizeu sira tuur iha Moisés nia fatin. Tan neʼe, halo tuir bá buat hotu neʼebé sira hatete, maibé keta halo tuir sira-nia hahalok, tanba sira la halo tuir buat neʼebé sira rasik hatete. Mateus 23:2-3
Oinsá hó ita? Opsaun saida mak ita iha bainhira ita hatene ona Lia Loos iha bíblia? Opsaun ida mak ita halo tuir ida seluk mak ita ignora ka la prekupa. Se ita hatene saida mak Maromak Nia Lia Loos, ida ne'e konsidera hanesan pekadu "Tan neʼe, se ema ida hatene oinsá atu halo buat neʼebé loos maibé la halo, nia halo ona sala"
Saida mak Lia Loos? Maromak Nia futarlia mak Lia Loos (João 17:17)
Mai ita gasta tempu balu Kada laran atu medita Na'i Maromak Nia futarlia no ita sei hetan bensaun.
Ksolok ba ema neʼebé la halo tuir ema aat nia konsellu No la hamriik iha ema sala-naʼin sira-nia dalan No la tuur hamutuk ho ema neʼebé hakribi buat neʼebé loos. Maibé nia gosta tebes Na'i nia ukun-fuan. Nia lee no medita Ninia ukun-fuan loron no kalan. Nia sei sai hanesan ai-hun ida neʼebé kuda besik bee-dalan, Ai-hun neʼebé fó fuan tuir ninia tempu, Ninia tahan sira sei la sai namlaek. No nia sei hetan susesu iha buat hotu neʼebé nia halo. Salmo 1:1-3
Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan
 |
| Mateus 22:37-39 |
0 comments:
Post a Comment