Sentimentu katak Maromak husik hela ita hanesan Sentimentu ne'ebé aat liu iha mundu. Ita hotu iha ita nia moris esperiensia buat balu ne'ebé hanesan tuir mai:
*bainhira ema ne'ebé ita Hadomi moras todan no ita halo orasaun maibé ita senti Katak Maromak la responde ita nia orasaun no to'o ikus ema ne'ebé ita hadomi mate;
* trajedia susar moris nian ne'ebé ita labele esplika;
*tempu balu ne'ebé ita senti katak Maromak permiti buat aat manan buat di'ak.
Ida ne'e mak Na'i Jesus Nia sentimentu molok Nia mate iha ai-kruz.
Mesmu iha tempu susar sira ne'e, ita senti katak Maromak husik hela ita, realidade Maromak nunka husik hela ita.
Liurai David hatete "Uluk haʼu joven no agora haʼu katuas ona, Maibé haʼu seidauk haree Maromak husik hela ema loos sira, No seidauk haree ninia oan sira tane liman husu hahán. Salmo 37:25
Maibé iha kazu Na'i Jesus, ita haree hanesan Maromak husik hela ema loos. Tanbasá mak Maromak husik hela Na'i Jesus? Ida ne'e tanba konsekuensia hosi pekadu ne'ebé aat tebes.
Profeta Isaias deskrebe "Na'i nia liman la badak toʼo labele fó salvasaun, No ninia tilun la diuk toʼo labele rona. Maibé imi-nia sala rasik mak haketak imi husi imi-nia Maromak, Imi-nia sala mak halo nia subar ninia oin husi imi, No nia lakohi rona ba imi" Isaias 59:1-2
Klamar ka ema neʼebé halo sala, ema neʼe rasik mak sei mate. Oan ida sei la lori todan tanba ninia aman nia sala, no aman ida sei la lori todan tanba ninia oan nia sala. Ema laran-loos sei hetan kolen tanba ninia hahalok loos, no ema laran-aat sei hetan kastigu tanba ninia hahalok aat. Ezequiel 18:20
Mate iha ne'e refere ba mate espiritual ne'ebé separa ita hó Maromak. Sala sira ne'e nia orijin hosi ne'ebé? "Entaun, sala tama iha mundu liuhusi ema ida, no mate tanba sala. Nuneʼe ema hotu mate tanba ema hotu halo ona sala" Roma 5:12
Tanba ita ema maksalak, nia konsekuensia saida? "Tanba sala nia kolen mak mate, maibé prezente neʼebé Maromak fó mak moris rohan-laek liuhosi Kristu Jesus ita-nia Naʼi" Roma 6:23
Imajina, ita senti ladi'ak iha momentu balu ne'ebé ita senti Maromak husik hela ita, oinsá sentimentu bainhira Maromak husik hela ita ba eternidade.
Bainhira Na'i Jesus terus iha kruz, ita haree Kristu lori sala no kastigu ba ita nia sala hotu, Sala MUNDU tomak. Hanesan Maromak Nia futarlia tuir mai ne'e:
1. Ita hotu laʼo-lakon hanesan bibi-malae, Ema ida-idak laʼo iha ninia dalan rasik, No Na'i mak tau ita hotu nia sala ba nia leten. Isaias 53:6
2. Tuir loloos nia rasik lori ita-nia moras, No nia lori ita-nia terus no moras oioin. Maibé ita haree nia hanesan ema neʼebé hetan moras, hetan kastigu husi Maromak no hetan terus. Isaias 53:4
Maromak husik hela Nia tanba ita Nia pekadu.
*Maromak Husik hela Na'i Jesus tanba ita nia sala
* Na'i Jesus esperiensia mate ba ita
*Na'i Jesus esperiensia julgamentu divinu ba ita
Maromak husik hela iha tempu ida atu nune'e Maromak labele husik ita ba moris Rohan-laek
Na'i Jesus hakilar, "Hau Nia Maromak...." Iha Nia hakilar ita kompriende oinsá Nia Senti moras momentu iha to'os Getsemani. To'o Nia hatete “Haʼu sente triste tebetebes hanesan atu mate. Hela iha neʼe no hadeer nafatin ho haʼu; Laʼo uitoan ba oin, nia hakneʼak no hakruʼuk ho oin ba rai, no harohan:“Haʼu-nia Aman, se bele karik, hasai tiha kalis neʼe husi haʼu. Maibé, halo tuir Ita-nia hakarak bá, laʼós haʼu-nia hakarak. Mateus 26:38-39
Iha tempu Na'i Jesus hatete Eli, Eli, lama sabaktani? Ida ne'e primeira ves Nia Senti separa hosi Aman Maromak desde eternidade.
Bainhira ema halo akuzasaun falsu ba Nia, Nia nonók de'it, maibé bainhira ita sala hotu tau ba iha Nia leten Nia hakilar "Eli, Eli, lama sabaktani?”, neʼe katak: “Haʼu-nia Maromak, haʼu-nia Maromak, tanbasá mak Ita husik hela haʼu? Mateus 27:46
Mai ita agradese ba Na'i Jesus Nia sakrifisiu liuhosi obedese ba Nia ukunfuan sira "Se imi hadomi haʼu, imi sei halo tuir haʼu-nia ukun-fuan sira" João 14:15. Ukunfuan Ida ne'ebé? Ukunfuan ne'ebé Hakerek iha Éxodos 20:13-17.
Saida mak akontese, se ita hatene Nia ukunfuan, maibé la halo tuir?
"Se ita kontinua halo tuir ninia ukun-fuan sira, neʼe katak ita hatene ona nia. Ema neʼebé dehan: “Haʼu hatene ona nia”, maibé la halo tuir ninia ukun-fuan sira, ema neʼe bosok-teen, no lia-loos la hela iha ema neʼe" 1João 2:3-4
Saida mak Lia loos?
Halo sira santu ho lia-loos. Ita-nia liafuan mak lia-loos" João 17:17
Lia Loos mak Maromak Nia futarlia. Se ita hatene ona Nia Lia Loos maibé lahalo tuir, saida mak akontese? "Tanba se ita halo beibeik sala ho neon bainhira ita hetan ona koñesimentu neʼebé loos kona-ba lia-loos, sei la iha tan sakrifísiu ba sala" Ebreu 10:26
Mai ita kumpri Maromak Nia futarlia, atu nune'e Na'i Jesus Nia sakrifisiu iha foho kalvariu bele kasu ita Nia sala.
Maromak akonpaña ita hotu 🙏🙏🙏
Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan
 |
| Mateus 27:46 |
Amen ✝️🙏
ReplyDeleteAmen
ReplyDelete