Atan ida labele serbí patraun naʼin-rua. Lukas 16:13

Atan ida labele serbí patraun naʼin-rua, tanba nia sei odi ida no hadomi ida seluk, ka nia sei apoia ida no hakribi ida seluk. Imi labele sai atan ba Maromak no mós ba Rikusoin. Lukas 16:13

Iha antigu Testamentu, profeta Elia (Elijah) dezafia ema Israel:  “Toʼo bainhira mak imi sei laran-rua? Se Na'i mak Maromak neʼebé loos, halo tuir nia bá! Se Baal mak Maromak neʼebé loos, halo tuir nia bá!” 1Reis 18:21

Kristu rasik mak hanorin katak "Atan ida labele serbí patraun naʼin-rua, tanba nia sei odi ida no hadomi ida seluk, ka nia sei apoia ida no hakribi ida seluk"

Iha konflitu de interese, bainhira iha lealidade ba patraun rua - tanba bele rezulta ba domin, lealidade no devosaun dedika ba parte ida boot liu ida seluk. Na'i Jesus rasik fó atensaun ba ita hotu katak "Imi labele sai atan ba Maromak no mós ba Rikusoin".

Na'i Jesus hanorin ita kona-ba lisaun inportante kona-ba rikusoin no mardomia (Stewardship), onestu no virtude. Maibé bainhira Nia hanorin kona-ba asuntu ne'e, ema Farizeu sira ne'ebé hadomi osan liu Maromak mós rona no sira la gosta Nia hanorin. Oinsá hó ita?

Ema Farizeu sira ne'e sira nia moris haree hanesan ema ne'ebé espirituál tebes, maibé Na'i Jesus dehan sira ne'e ema laran-makerek, kan-teen, serbí Maromak hó ibun de'it no bosok-teen. Oinsá hó ita? Mai ita halo reflesaun ba ita idaidak nia an. Seráke ita badinas ba igreja mas ita nia hahalok hanesan ka aat liu fali sira ne'ebé la ba igreja?

Ita presiza osan, ema hotu-hotu presiza osan. Maibé Na'i Jesus hanorin mai ita katak imposivél mai ita atu moris ba Maromak karik ita nia prioridade fokus ba buat ida ka ema seluk. Feto no mane ne'ebé serbí Maromak hó loos, sei la serbí buat seluk - hanesan osan, telemovél ka buat seluk iha sira nia moris liu fali Maromak.

Mai ita "‘... hadomi Na'i, ita-nia Maromak, ho ita-nia laran tomak, ho ita-nia moris tomak, ho ita-nia kbiit tomak no ho ita-nia neon tomak’, ...(Lukas 10:27) no haree ba Na'i Jesus ne'ebé   "sei fó buat hotu neʼebé ita presiza tuir ninia rikusoin glória nian liuhusi Kristu Jesus (Filipenses 4:19).

**********************************
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

Lukas 16:13