Iha ai-knanoik ne'e ita hanesan oan-mane ne'ebé lakon. Hanesan ema pekadór ne'ebé arepende no fila fali ba Aman Maromak.
Bainhira ita la'o sai hosi Aman Maromak nia prezensa, ita sai atan ba Diabu. Atu fila fali ba Aman Maromak ita presiza arependementu. Atu arepende ita presiza rekoñese katak ita ema maksalak/pekadór. Saida mak pekadu? Bíblia responde "Ema neʼebé halo sala, nia mós kontra ukun-fuan, no sala katak kontra ukun-fuan"1João 3:4
Mai ita aprende hosi ai-knanoik ne'e:
Dahuluk, oan-mane ne'e komesa hatene nia sofrementu, sente nia an sala, sente nia hahalok ne'ebé aat. Ita bele hatene ita nia an katak ita ema maksalak bainhira Na'i Maromak Nia Espiritu Santu mai leno no hatudu ita nia sala. "Bainhira ninia hanoin loos ona, nia dehan: ‘Haʼu-nia aman nia atan sira iha ai-han barak, maibé haʼu iha neʼe atu mate tan deʼit hamlaha!" Lukas 15:17
Daruak, nia desidi atu husik hela nia sala no hametin nia laran atu fila imidiatame ba nia aman (Maromak). Nia hatete Haʼu sei hamriik no fila ba .., etc., Lukas 15:18.
Datoluk, tanba Espiritu Santu nia influensia, nia iha forsa atu haree ba Maromak hanesan Aman domin na'in. "Haʼu sei hamriik no fila ba haʼu-nia aman no dehan: “Aman, haʼu halo ona sala hasoru lalehan no mós hasoru Ita"
Dahaat, Nia konfesa nia sala no sente Nia an la merese (unworthy) ba Maromak Nia favór ka Maromak Nia di'ak. "Haʼu la merese tan atu Ita bolu haʼu nuʼudar oan. Halo haʼu sai nuʼudar Ita-nia atan ida.” Lukas 15:19.
Dalima, Nia mai hó espiritu obedese atu submete nia an ba Maromak Nia ukun.
Daneen, nia prátika saida mak nia desidi ona imidiatamente (agora kedas, la'os aban ka bainrua). Nia buka Maromak tuir tempu ne'ebé nia determina ona. "Entaun, nia hamriik no fila ba ninia aman. Kuandu nia sei dook hela, ninia aman haree nia no hanoin tebetebes nia. Ninia aman halai hasoru nia hodi hakoʼak no reʼi nia" Luke 15:20.
Dahitu, Maromak simu hó laran-maus no simu nia hó domin, perdua nia, haluha hotu sala ne'ebé nia halo no hatama nia ba familia Lalehan nian." .....Kuandu nia sei dook hela, ninia aman haree nia no hanoin tebetebes nia. Ninia aman halai hasoru nia hodi hakoʼak no reʼi nia" Luke 15:20.
Daualu, Nia simu hatais ka ropa santu, hamutuk hó Maromak no haksolok hó Kristu. Lalais! Lori mai roupa neʼebé furak liu no fó-hatais nia, tau kadeli ba ninia liman no tau sandálias iha ninia ain" Lukas 15:22.
Finalmente, oan ho Aman nia relasaun restaura fila fali. Saida mak akontese bainhira ita restaura ita nia relasaun hó Maromak? Mai ita haree:
Dahuluk, Aman ne'e simu hó festa agradesementu. "Lori mai karau-oan bokur hodi oho, no mai ita han no haksolok hamutuk" Lukas 15:23
Daruak, familia Lalehan nian haksolok. "Nuneʼe mós haʼu hatete ba imi, Maromak nia anju sira sei haksolok kuandu ema sala-naʼin ida arrepende ninia sala. Lukas15:10.
Iha ai-knanoik ne'e, oan-mane kiik ne'ebé lakon reprezenta ema Jentiu sira (Inklui ita ema Timor); no oan-mane boot, ne'ebé iha tempu naruk serbí nia aman (Luke 15:20), reprezenta ema Judeu sira.
Ema Judeu sira, hanesan oan mane boot iha ai-knanoik ne'e la gosta ema Jentiu sira, tanba ema Jentiu sira moris la tuir Maromak Nia hakarak, ema Jentiu sira ne'e ema pekadór. Hanesan ema Jentiu, ita agradese, tanba Na'i Jesus Nia sakrifisiu, ita mós sai eransa ba Reiñu Lalehan nian.
**********************************
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
 |
| Lukas 15:32 |
0 comments:
Post a Comment