Haʼu sei haruka haʼu-nia oan-mane neʼebé haʼu hadomi

Tuirmai, nia konta ai-knanoik neʼe ba sira: “Mane ida kuda uvas iha ninia toʼos no fó-aluga ba toʼos-atan sira, depois neʼe, nia bá rai liʼur iha tempu kleur. Kuandu toʼo ona tempu koʼa nian, nia haruka ninia ema ida atu bá hasoru toʼos-atan sira, atu nuneʼe sira bele fó ba nia uvas-fuan balu husi ninia toʼos. Maibé, toʼos-atan sira baku nia no haruka nia fila ho liman-mamuk. Dala ida tan, nia haruka ema seluk. Toʼos-atan sira mós baku ema neʼe, hamoe nia, no haruka nia fila ho liman-mamuk. Ba dala terseiru nia haruka tan ema ida, maibé sira mós hakanek ema neʼe no soe nia ba liʼur.  Ho ida-neʼe, toʼos-naʼin dehan: ‘Saida mak haʼu tenke halo? Haʼu sei haruka haʼu-nia oan-mane neʼebé haʼu hadomi. Karik sira sei respeitu nia.’  Kuandu toʼos-atan sira haree nia, sira hatete ba malu: ‘Nia mak sei simu toʼos neʼe nuʼudar liman-rohan. Mai ita oho nia, atu nuneʼe ninia liman-rohan bele sai ita-nian.’  Ho ida-neʼe, sira lori nia ba toʼos liʼur no oho nia. Entaun, toʼos-naʼin sei halo saida ba sira?Nia sei mai no oho toʼos-atan sira-neʼe, no nia sei fó toʼos-uvas ba ema seluk.” Lukas 20:9-16

Mane ida kuda uvas iha ninia toʼos no FÓ-ALUGA BA TOʼOS-ATAN SIRA : fó aluga to'os uvas hanesan prátika ne'ebé komún iha Na'i Jesus Nia tempu.

KUDA UVAS IHA TO'OS: Ai-knanoik Ida ne'e iha ligasaun hó kultura ema Israel sira nian.   Rona-na'in Na'i Jesus nian iha momentu neebá kompriende katak  "to'os uvas"  iha antigu Testamentu refere ba ema Israel sira (Isaias 5:1-7). Iha ai-knanoik ida ne'e "toʼos-atan sira" reprezenta lideransa Relijiaun iha ema Judeu sira nia leet.

FÓ-ALUGA BA TOʼOS-ATAN SIRA: to'os atan sira la sosa to'os uvas ne'e no sira mós la halo to'os ne'e. To'os atan sira hetan permisaun hosi to'os na'in ne'ebé laran-diak atu serbisu de'it iha to'os uvas ne'e. Maibé sira kontra fali to'os na'in no loron ida sira sei hatán ba sira nia hahalok ne'e.

Ai-knanoik ne'e ko'alia mai ita kona-ba Maromak hanesan to'os na'in iha pasiénsia ne'ebé boot ba to'os atan sira ne'ebé laran aat kompara hó ita.

SAIDA MAK HAʼU TENKE HALO? Haʼu sei haruka haʼu-nia oan-mane neʼebé haʼu hadomi. Na'in ba to'os uvas filafila koko atu simu nia direitu hosi nia to'os uvas no hosi to'os atan sira. To'os atan sira rejeita to'os na'in dahuluk, daruak no datoluk. Ikus mai Nia haruka nia oan-mane neʼebé Nia hadomi. Karik sira sei respeitu nia.

Nia mak sei simu toʼos neʼe nuʼudar liman-rohan. Mai ita oho nia, atu nuneʼe ninia liman-rohan bele sai ita-nian : toʼos-atan sira hanoin katak sira sei benefisia hosi oho oho  to'os na'in nia oan ne'ebé sei simu to'os uvas hanesan liman-rohan. Maibé sira sala.

Ai-knanoik ne'e hatete mai ita katak Na'i Jesus hatene ona katak Nia mak to'os na'in nia oan mane ne'e- Maromak Nia Oan-mane no Na'i Jesus hatete katak sira sei oho nia iha tempu badak. Mate tuir hakerek nanis ona iha eskritura atu salva ita nia sala, maibé ita sira ne'ebé rejeita Na'i Jesus no Nia Lia Loos to'o Loron ikus sei simu Na'i Maromak Nia julgamentu.

Na'i Jesus Nia liafuan iha Sn João 12:48 hatete "Kona-ba ema neʼebé la simu haʼu no la simu haʼu-nia liafuan, iha ida neʼebé sei julga nia. Liafuan neʼebé haʼu koʼalia ona mak sei julga nia iha loron ikus"

Iha ema balu mak la halo tuir Na'i Jesus Nia hanorin tanba lahatene; ema balu lakoi lee Bíblia atu hatene Na'i Jesus Nia hanorin. Atu lee ka la lee, Na'i Jesus Nia liafuan sei julga ita hotu iha loron ikus. Tanba ne'e mai ita enkoraje malu atu lee Bíblia  loronloron atu hatene Na'i Jesus Nia hanorin.

**********************************
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane  mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

Lukas 20:13