Jesus hatete “Tebes, tebes, Hau dehan ba imi, see deit nebee halo sala mak atan ba sala" João 8:34 BK. Bainhira ita halo sala ka pekadu ita sai atan: ba sex (ba sira ne'ebé komete adultériu no fornikasaun), sai atan ba substansia ne'ebé addictive ba sira ne'ebé konsumu alko/tua, sigaru, droga nsst), sai atan ba oinsá ema seluk ninia hanoin kona-ba ita, sai atan ba ta'uk ema seluk, sai atan ba kaan ba podér nsst. Se ho Jesus ita hotuhotu sai atan ba pekadu sira ne'e. Maibé Jesus dehan "Nunee se Oan Mane mak halo imi livre, imi sei sai livre duni" João 8:36
Jesus halo ita libre hosi ta'uk. Bíblia deskrebe "Nee duni, tanba oan sira nee iha isin no raan, Nia rasik mos hola parte ho isin no raan nee, atu nunee liu hosi mate, Nia bele halakon ida nebee iha podér mate nian, nee katak Diabu. No Nia bele salva mos ema hotu nebee tauk mate, nebee hela nudar atan ba tauk nee durante sira nia moris tomak" Ebreu 2:14-15. Jesus hatete iha ne'e katak "Tebes, tebes, Hau dehan ba imi, se ema ida halo tuir Hau nia liafuan, nia sei nunka mate.” João 8:51
Mate la'os rohan ba ema sira ne'ebé Jesus fó libre ona, maibé mate iha Kristu hanesan deskansa temporariu ida molok tama ba Lalehan. Bainhira Jesus fó deliberasaun hosi mate, Nia mós fo deliberasaun hosi sentimentu ta'uk tamba kauza oinoin.
Ref. John 8:31-59
Lia Loos Sei Foo Liberdade
31 Jesus dehan ba ema Judeu sira nebee fiar ba Nia, “Se imi hela iha Hau nia liafuan, imi mak Hau nia eskolante duni. 32 No imi sei hatene lia loos, no lia loos sei halo imi livre.” 33 Sira hataan ba Nia, “Ami mak Abraão nia bei-oan, no ami nunka sai atan ba ema ida. Nusaa mak O dehan, ‘Imi sei sai livre’?”
34 Jesus hataan ba sira, “Tebes, tebes, Hau dehan ba imi, see deit nebee halo sala mak atan ba sala. 35 Atan sei la hela nafatin iha uma too tinan ba tinan, maibee Oan Mane mak hela nafatin too tinan ba tinan. 36 Nunee se Oan Mane mak halo imi livre, imi sei sai livre duni. 37 Hau hatene katak imi mak Abraão nia bei-oan. Maibee imi buka atu oho Hau, tanba Hau nia liafuan la hetan fatin iha imi nia laran. 38 Hau koalia buat nebee Hau haree ona hosi Hau nia Aman, no imi halo buat nebee imi haree ona hosi imi nia aman.”
Imi Nia Aman Diabu
39 Sira hataan ba Nia, “Abraão mak ami nia aman.” Jesus dehan ba sira, “Se imi mak Abraão nia oan duni, imi sei halo tuir Abraão nia hahalok. 40 Maibee agora imi buka atu oho Hau, nebee foo sai ba imi lia loos nebee Hau rona hosi Maromak. Abraão la halo ida nee. 41 Imi halo tuir hahalok hosi imi nia aman.” Sira dehan ba Nia, “Ami la moris mai hosi sala sexuál. Ami iha Aman ida deit, nebee Maromak.” 42 Jesus dehan ba sira, “Se Maromak imi nia Aman, imi sei hadomi Hau. Tanba Hau mai hosi Maromak no Hau iha nee. Hau la mai tanba Hau nia hakarak rasik, maibee Nia mak haruka Hau mai. 43 Tanba saa mak imi la kompriende buat nebee Hau dehan? Tanba imi la bele rona Hau nia liafuan. 44 Imi hosi imi nia aman diabu. No imi hakarak halo tuir imi nia aman nia hakarak. Hori uluk kedas nia mak oho door. Nia la bele hamriik iha lia loos, tanba la iha lia loos iha nia. Bainhira nia koalia bosok, nia koalia tuir ninia aan rasik. Tanba nia mak bosok-teen, no lia bosok nia aman. 45 Maibee tanba Hau koalia lia loos ba imi, nunee imi la fiar Hau. 46 Imi ida nebee mak bele hatudu katak Hau halo sala? Se Hau koalia lia loos, tanba saa mak imi la fiar Hau? 47 Ema nebee hosi Maromak rona Maromak nia liafuan. Imi la rona tanba imi la mai hosi Maromak.”
Jesus Moris Molok Abraão
48 Ema Judeu sira hataan ba Nia, “Laos katak ami koalia loos bainhira ami dehan katak O mak ema Samaria, no O iha diabu ida?” 49 Jesus hataan, “Hau la iha diabu ida. Maibee Hau foo onra ba Hau nia Aman, no imi despreza Hau. 50 Hau la buka glória ba Hau nia aan rasik. Iha Ida nebee buka glória nee no Nia mak Juis. 51 Tebes, tebes, Hau dehan ba imi, se ema ida halo tuir Hau nia liafuan, nia sei nunka mate.” 52 Ema Judeu sira dehan ba Nia, “Agora ami hatene katak O iha diabu ida! Abraão mate ona, no profeta sira mos mate ona. Maibee O dehan, ‘Se ema ida halo tuir Hau nia liafuan, nia sei nunka mate.’e 53 O boot liu fali ami nia aman Abraão nebee mate ona ka? No profeta sira mos mate ona! O halo aan nee see fali?” 54 Jesus hataan, “Se Hau foo onra ba Hau nia aan, Hau nia onra nee la iha folin. Hau nia Aman mak foo onra mai Hau, Nia nebee imi dehan, ‘Nia mak ami nia Maromak.’ 55 Maibee imi la konhese Nia. Hau konhese Nia. No se Hau dehan, ‘Hau la konhese Nia,’ Hau sei sai bosok-teen hanesan mos imi. Maibee Hau konhese duni Nia, no halo tuir Ninia liafuan. 56 Imi nia aman Abraão haksolok bainhira nia haree Hau nia loron mai. Nia haree loron nee, no nia kontenti.” 57 Nunee ema Judeu sira dehan ba Nia, “O nia tinan seidauk too lima-nulu, no O haree tiha ona Abraão ka?” 58 Jesus dehan ba sira, “Tebes, tebes, Hau dehan ba imi, molok Abraão moris, Hau iha ona.”f 59 Nunee sira foti fatuk atu tuda Nia. Maibee Jesus subar aan, no sai hosi Templu.
0 comments:
Post a Comment