Ohin loron ho ha'u iha paraizu

Versikulu iha Bíblia ne'ebé ema barak uza hodi prova kona-ba klamar moris ba nafatin (Immortality of soul) mak Lukas 23:43 - "Jesus dehan ba nia, “Tebes Hau dehan ba o, ohin o sei hamutuk ho Hau iha Paraizu" 

Lee versikulu iha leten maesak de'it, fo impresaun katak iha loron ne'eba kedas, momentu Jesus mate, Jesus ho ema na'ok teen ne'e ba hamutuk kedas iha paraizu. Ida ne'e labele fo surpreza tamba tradusaun sira ne'e halo hosi ema sira ne'ebé ninia dogma ka dutrina kona-ba klamar ne'ebé bele moris ba nafatin. Maibé seraké ida ne'e tradisaun ne'ebé di'ak liu.

Kompara Lukas 23:43 ho João 20:17 no João 14:1-3 tuir mai:

Jesus dehan ba nia, “Tebes Hau dehan ba o, ohin o sei hamutuk ho Hau iha Paraizu" Lukas 23:43 BK

Jesus dehan ba nia, “Keta kaer Hau, tanba Hau seidauk sae ba Hau nia Aman. Maibee baa hasoru Hau nia maun-alin sira, no dehan ba sira, ‘Hau sei sae ba Hau nia Aman, no imi nia Aman, ba Hau nia Maromak, no imi nia Maromak.’ João 20:17 BK

Keta laran susar: fiar ba Maromak, fiar mos ba Hau.  Hau nia Aman nia uma iha fatin barak atu hela. Se la nunee karik, Hau sei foo hatene ba imi. Hau baa atu prepara fatin ba imi.  No se Hau baa no prepara fatin ba imi, Hau sei mai fali, no lori imi ba Hau nia fatin. Nunee iha fatin nebee Hau hela, imi mos bele hela iha nebaa" João 14:1-3

Oinsá ita bele kompriende Jesus Ninia promesa ba na'ok-teen ne'ebé arepende bazeia-ba Jesus Ninia lia-fuan ba Maria Magdalena iha João 20:17 No Jesus Ninia lia-fuan ba Ninia dixipulu sira iha João 14:1-3?

Asumsi katak Kristu no na'ok-teen ba kedas paraizu (ka Lalehan) kontradiz ho Jesus Ninia lia-fuan ba Maria Magdalena depoisde moris hi'as, ne'ebé katak Nia (Jesus) seidauk ba Aman Maromak iha lalehan (João 20:17). Eru ne'ebé katak Jesus ho na'ok-teen ba kedas lalehan iha loron ne'eba kedas mós kontradiz ho Jesus Ninia promesa ba Ninia dixipulu sira katak sira sei ba lalehan bainhira Jesus Mai fali ba dala-rua (João 14:1-3).

Entaun oinsá ita lee Versikulu iha Lukas 23:43?, Loos mak " “Tebes Hau dehan ba o ohin, o sei hamutuk ho Hau iha Paraizu" Lukas 23:43 BK (nota, virgula tau depoisde ohin. Nota mós katak iha ninia lian orijinal (Gregu), virgula la iha, virgula tau depois de tradisaun).

 Ho lia-fuan seluk Jesus dehan, ohin loron ha'u hatete ba ó, O sei hamutuk ho ha'u iha paraizu (iha futuru). Jesus promete ba ema ne'e iha momentu ne'eba katak nia sei hetan salvasaun.

Bainhira ita lee historia kona-ba na'ok-teen ne'ebé arepende (Lukas 23:39-43), ne'ebé mesmu pekadór, nia la iha buat ida atu oferese ba Maromak, Jesus promete moris rohan-laek ba nia. Historia ne'e hatudu mai ita katak salvasaun ne'e so liuhosi fé de'it.

Referensia: Lukas 23:39-43, João 20:17 no João 14:1-3

✝️✝️✝️✝️✝️✝️✝️✝️✝️✝️✝️✝️

Agora ita rona ona Maromak Nia futarlia, no Maromak dehan nune'e: 

Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16

Maromak mós hatete nune'e:

Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?

Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12

Maromak akonpaña ita hotu nia moris ohin loron no ba oin.

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏