Saida mak marka ema Kristaun? Hadomi malu!

Falta domin iha vida kristaun hanesan fatór ida ne'ebé impede Mensajen Jesus nian. Karik ita hakarak halo mudansa iha ita-nia nasaun, atu ema komesa tuir dalan Na'i Jesus nian, ita tenke komesa hadomi malu. Ida ne'e signifika katak ita hadomi ema ne'ebé maihosi igreja ne'ebé lahanesan, fiar ne'ebé la hanesan, tradisaun ne'ebé la hanesan, ema ho hanoin ne'ebé la hanesan ho ita.

Komesa hadomi malu iha ita-nia igreja rasik. La iha domin, la iha unidade. Domin kria unidade. Domin atrai ema seluk ba Jesus. Hadomi Maromak no hadomi malu iha Jesus Ninia naran, tenke sai ita-nia ojetivu prinsipál. Domin ida hanesan ne'e mak bele halo mudansa ba mundu.

Iha leitura eskritura ohin loron nian, ita iha ema na'in 3 (Judas, Pedro no João ne'ebé sai autór ba Evanjellu João) ne'ebé iha relasaun radikál ho Jesus. Sira reprezenta ita iha momentu ne'ebé diferente iha ita-nia moris.

João, dixipulu ne'ebé Jesus hadomi liu, hatene Jesus Nia domin kle'an tebes. Hosi dixipulu hotu João mak besik liu ba Jesus. João mak dixipulu ida ne'ebé tuur besik liu ba Jesus (João 13:23). Iha evanjellu ida ne'e temi dala haat katak João mak dixipulu ne'ebé Jesus hadomi liu. Dahuluk mak iha versikulu 23, iha kruz (João 19:26), iha rate ne'ebé mamuk (João 20:2) no ho maksoin ne'ebé moris hi'as ona (João 21:20). Jesus hatudu katak ita hotu hetan xamada atu relasaun besik liu ba Jesus.

Bazeia ba esperiensia domin ho Jesus liuhosi relasaun ne'ebé besik liu ba Jesus, João ko'alia barak kona-ba domin. João hakerek Jesus hatete ba dixipulu sira dehan " Hau foo ukun fuan foun ida ba imi hodi imi sei hadomi malu: hadomi malu hanesan Hau hadomi imi. Nunee ema hotu sei hatene katak imi mak Hau nia eskolante sira, se imi hatudu domin ba malu" João 13:34-35

Ema lahadomi malu tamba razaun balu tuir mai nee. Judas trai Jesus mesmu nia besik loos ho Jesus. Bíblia deskrebe "‘Nia nebee haan paun hamutuk ho Hau mak hamriik hasoru Hau" João 13:18. Satanas tama ba Judas (João 13:27). Iha ne'e ita haree buat ida ne'ebé kontrariu ho domin. Judas odi domin. Nia revolta hasoru Jesus, maibé Jesus kontinua hadomi Judas.

Pedro hadomi Jesus. Maibé ninia personalidade komplexu tebes. Pedro dehan Nia sei prontu mate ba Jesus (João 23:37), maibé Jesus dehan ba nia "O sei foo duni o nia moris tanba Hau ka? Tebes, tebes, Hau dehan ba o, molok manu aman kokoreek, o sei nega Hau dala tolu.” João 13:38 no ida ne'e mak Pedro halo (lee iha João 28:15-28, 25-37) maibé Jesus kontinua hadomi Pedro.

Jesus dezafia ita ho lia-fuan tuir mai " Hau foo ukun fuan foun ida ba imi hodi imi sei hadomi malu: hadomi malu hanesan Hau hadomi imi" João 23:34. Jesus hadomi ita to'o mate iha kruz. Nia dehan ita tenke banati tuir Nia ezemplu no hatudu sakrifisiu domin nian ida ne'e mak marka Kristaun nian "Nunee ema hotu sei hatene katak imi mak Hau nia eskolante sira, se imi hatudu domin ba malu" João 23:35 BK

Domin hanesan forma evanjelismu ne'ebé efetivu Liu. Bainhira ema haree domin ne'ebé reál, sira haree Maromak. Dalan di'ak liu atu ko'alia ba ema kona-ba Jesus mak hadomi sira no hadomi ema Kristaun seluk 

Referensia: João 13:18-38

✝️✝️✝️✝️✝️✝️✝️✝️✝️✝️✝️✝️

Agora ita rona ona Maromak Nia futarlia, no Maromak dehan nune'e: 

Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16

Maromak mós hatete nune'e:

Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?

Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12

Maromak akonpaña ita hotu nia moris ohin loron no ba oin.

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏