Entaun, se imi haan ka hemu, ka iha buat hotu ne'ebé imi halo, halo buat hotu-hotu ba Maromak Nia glória. 1 Korinto 10:31 BK
Iha 1 Korinto 10, apóstolu Paulo hanorin ema kristaun oinsá atu moris iha dalan ne'ebé fó glória ba Maromak iha sira-nia moris loroloron nian. Antes versíkulu ne'e, nia ko'alia kona-ba kuidadu atu la halo ema seluk sidi no hili buat ne'ebé di'ak, la'ós de'it ba ita-nia an rasik, maibé mós ba ema seluk. Ida-ne'e ajuda ita atu komprende sentidu hosi versíkulu 31.
Halo buat ruma ba Maromak Nia glória, ida-ne'e katak moris iha dalan ne'ebé hatudu Maromak Nia laran-di'ak, domin, no lia-loos. Apóstolu Paulo uza ezemplu ne'ebé simples, han no hemu, atu hatudu katak buat ki'ik mós importante ba Maromak. Ida-ne'e signifika katak ita-nia moris loroloron nian la'ós de'it iha igreja mós tenke fó onra ba Maromak.
Fo glória ba Maromak la rekere talentu espesiál ka asaun publika boot sira. Fo glória ba Maromak bele hatudu liuhusi onestu iha ita-nia serbisu fatin, hatudu laran-di'ak ba ita-nia família, pasiénsia ba ema seluk, no fiél ba ita-nia responsabilidade sira. Kuandu ita hili buat ne'ebé loos no hatudu domin, ita refleta Maromak Nia karakter.
Versíkulu ne'e mós hanorin ita atu hanoin didi'ak molok halo buat ida. Tanbasa?, tamba ita-nia desizaun afeta ema seluk. Kuandu ita moris ho domin, ita ajuda ema seluk, atu bele haree Kristu iha ita. Ida-ne'e fó glória ba Maromak, tanba ema haree Maromak Nia domin iha ita-nia asaun sira.
Moris hodi fó glória ba Maromak mós ajuda ita halo desizaun. Kuandu ita la serteza kona-ba ba saida mak ita bele halo, ita bele husu: "Serake ida-ne'e fó glória ba Maromak?" Pergunta simples ne'e bele proteje ita husi desizaun ne'ebé sala no lori ita ba moris ne'ebé di'ak liu tuir Maromak Nia hanorin.
Kuandu ita hili atu fó onra ba Maromak iha buat hotu ne'ebé ita halo (kiik ka boot), ita-nia moris sai nu'udar sasin ba Maromak Nia grasa. Moris ba Ninia glória loroloron ajuda ita la'o ho laran-metin nafatin iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment