Oinsá halo Maromak kontente?

Keta haluha atu halo di'ak no atu fahe buat ne'ebé ita iha. Tanba Maromak kontenti kona ba sakrifísiu hanesan ne'e. Ebreu 13:16 BK 

Ebreu 13:16

Livru Ebreu hanorin ema fiar-na'in oinsá atu moris ho laran-metin nu'udar Jesus nia dixipulu. Iha kapítulu ikus, hakerek-nain fó matadalan kona-ba prátika moris Kristaun loroloron nian. Ebreu 13: 16 fó-hanoin ita katak halo Maromak kontente la'ós de'it ho liafuan ka aktu relijiaun de'it, maibé kona-ba oinsá ita trata ema seluk. 

Maromak kontente kuandu ita halo buat di'ak. Halo di'ak signifika hatudu laran-di'ak, fó perdua, no tau matan ba ema ne'ebé presiza. Karik hahalok sira-ne'e mak buat ki'ik ida, maibé folin-boot ba Maromak. Asaun sira ne'e hatudu katak Ninia domin moris iha ita-nia laran. 

Versikulu ne'e mós ko'alia kona-ba fahe (buat ruma) ho ema seluk. Fahe la'ós de'it osan. Fahe iha forma oinoin: bele fahe hahán, tempu, fó liafuan korajen, ka fó komfortu. Kuandu ita fahe buat ne'ebé Maromak fó mai ita, ita hatudu fiar ba Maromak no hadomi ema seluk. Maromak bolu aktu ida hanesan ne'e nu'udar "sakrifísiu" tanba dala barak aktu sira ne'e presiza haka'as an, sakrifika ita-nia tempu, ka presiza sai hosi ita-nia zona komfortu. 

Iha Testamentu Antigu, ema hasa'e sakrifísiu animál atu halo Maromak kontente. Maibé iha Testamentu Foun, Maromak hakarak atu ita hasa'e hasa'e sakrifísiu ne'ebé diferente - ne'e mak moris nakonu ho domin. Kuandu ita halo buat ne'ebé di'ak no fahe ho ema seluk, ita hasa'e ita-nia moris ba Maromak hodi fó onra ba Nia. 

Hanorin ne'e ajuda ita atu komprende katak ema hotu bele halo Maromak kontente. Ita la presiza sai riku, famozu, ka iha edukasaun boot. Ita presiza de'it Ita-nia vontade atu halo tuir Maromak no hadomi ema seluk. 

Kuandu ita moris ho laran-di'ak, laran-luak, no domin, ita sei fó ksolok ba Maromak Nia laran. Moris obedese ba Maromak no serbí ema seluk loroloron, ida-ne'e sei ajuda ita atu la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏