Na'i Jesus ko'alia kona-ba matan moris neon na'in, alerta no prontidaun hasoru kalamidade ka susar ne'ebé sei mai derepente. Ema ne'ebé bolu sira nia an Kristaun tenke moris hó prontidaun katak Na'i Jesus bele fila fali mai tuir nia promesa iha João 14 iha kualker tempu.
Na'i Jesus alista buat tolu ne'ebé bele halo ita monu 1. Festa; 2. Lanu; 3. Prekupasaun kona-ba moris ne'e (prekupasaun mundu nian).
Espresaun "derrepente deʼit loron neʼe toʼo ba imi" refere ba mundu nia rohan, bainhira Na'i Jesus fila fali mai ba dala-2. "Alerta" signifika hau fo neon-horis ka alerta ba imi.
Iha Mateus 24:36-39 Na'i Jesus dehan: “36 Kona-ba loron no oras, ema ida la hatene, anju sira iha lalehan la hatene no Oan-Mane mós la hatene, só Aman deʼit mak hatene. 37 Hanesan iha Noé nia tempu, nuneʼe mós ho tempu neʼebé Oan-Mane toʼo mai. 38 Iha tempu antes rai-nabeen, ema han-hemu, mane no feto sira kaben, toʼo loron neʼebé Noé tama ba ró laran. 39 Sira la tau atensaun toʼo rai-nabeen akontese no halakon sira hotu, nuneʼe mós ho tempu neʼebé Oan-Mane toʼo mai"
Iha versu iha leten ita mós kompriende katak ema Kristaun presiza prontu iha tempu ne'ebé de'it atu hasoru Na'i. Na'i Jesus alerta iha versu ne'e katak estilu moris ema iha mundu nia rohan ka tempu ikus sei hanesan hó tempu Noe nian. Noe Haklaken durante tinan 120 no la iha ema ida rona nia, hanesan mós ema barak iha ita nia tempu la interese rona, prepara an no alerta ba Na'i Jesus atu mai fali ba dala-2.
Ita la hakfodak haree ema sira ne'ebé la fiar ba mensajen evanjellu moris arbiru de'it tuir isin nia hakarak, maibé ba ita sira ne'ebé fiar la bele halo tuir mundu nia hakarak.
Ema fiar na'in ne'ebé loloos, nia moris hosi loron ba loron antisipa no hein Kristu fila fali mai no kuida sira nia hahalok hosi pekadu. Apostolu João hatete iha 1João 2:28 nune'e: "Neʼe duni, oan doben sira, nafatin hela hó Nia, atu nuneʼe kuandu Nia mosu mai, ita bele konfia an no sei la moe ba Nia bainhira nia mosu mai"
Seráke ita boot prontu atu hasoru Na'i Jesus? Seráke ita boot halo preparasaun espirituál ruma? Bíblia hatete mai ita katak "15 Keta hadomi mundu ka buat neʼebé iha mundu. Se ema ida hadomi mundu, domin ba Aman la hela iha nia,16 tanba buat hotu iha mundu neʼe, hanesan hakarak isin nian, hakarak matan nian no foti an, buat sira-neʼe la mai husi Aman, maibé mai husi mundu neʼe".1João 2:15-16
Na'i Jesus hatete mai ita atu " Matan-moris nafatin bá, no harohan bá iha tempu hotu, atu nuneʼe imi bele halai sees hosi buat sira-neʼe hotu neʼebé atu akontese, no atu Oan-Mane bele simu imi.” Lukas 21:36.
Iha Jardin Getsemani, Na'i Jesus husu Nia dixípulu sira atu "Matan-moris nafatin bá no harohan beibeik, atu nuneʼe imi labele monu ba tentasaun. Espiritu hakarak, maibé isin fraku" Mateus 26:41
Ita presiza Matan-moris neon-nain no halo orasaun nafatin atu ita fiar no fiél nafatin ba Na'i Maromak. Ita nia fé, ita nia alerta, orasaun no konfiansa ba Kristu atu fila fali mai konsidera hanesan buat ne'ebé loos iha Maromak Nia futar-oin. Hanesan Abrão, bainhira Nia fiar ba Maromak no Maromak konta ida ne'e hanesan buat ne'ebé loos (Génesis 15:6).
Alerta no orasaun halo ema fiar-na'in sira prontu hamriik iha Na'i Jesus Nia oin bainhira Nia fila hikas mai; prontu atu hetan justisa, no sei transforma ita nia isin ne'ebé mortál sai-ba imortál (Filipenses 3:21); prontu atu serbí Maromak loron no kalan iha nia templu” (Apokalipse 7:15).
Oinsá ita halo ida ne'e? Kro'at ne'ebé Na'i Jesus uza mak orasaun no Na'i Maromak Nia futarlia. Na'i Jesus Nia dixípulu sira ohin loron mós presiza alerta no halo orasaun beibeik. Tanba buat mundu nian barak mak sei atrai ita, atu halo tuir isin nia hakarak no lasu diabu nian (2 Korintu 2:11).
Bainhira ita nia matan ses hosi Na'i Jesus no Nia Promesa atu fila fali mai, ita nia atensaun sei ba buat mundu nian no sei fó fuan ne'ebé uitoan ba Reiñu Lalehan (1 Timoteo 6:18–19). Na'i Maromak alerta ba ita atu prontu iha tempu ne'ebé de'it atu hamriik iha Nia futar-oin no responsavél ba saida de'it mak ita halo iha ita nia moris tomak (Roma 14:12; 1 Pedro 4:5; Mateus 12:36).
Ita nia dever hanesan ema Kristaun mak obedese ba nia ukun-fuan sira (Éxodos 20:3-17). Karik ita falla no monu ba sala, Na'i Maromak Nia futarlia dehan "Se ita konfesa ita nia sala, Maromak neʼebé giél no loos, sei perdua ita-nia sala no hamoos ita husi hahalok aat hotu" 1João 1:9
Mai ita enkoraje malu nafatin atu matan moris neon na'in no halo orasaun nafatin atu hein Na'i Jesus hiit-an mai.
**********************************
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
 |
| Lukas 21:36 |
0 comments:
Post a Comment