Fini ne'e mak Na'i Maromak Nia futarlia, no Ida ne'ebé Kari mak Na'i Jesus. Agora Na'i Jesus ba ona tur iha Aman Nia sorin kwana no misaun ida ne'e sai misaun ita sira ne'ebé fiar ba Na'i Jesus (Mateus 28: 18-20).
Bainhira ita Rona ka lee Na'i Maromak Nia futarlia iha Sagrada Bíblia, ita tama ba grupu kategoria ida hosi grupu haat tuir mai:
Grupu 1. Bainhira nia kari hela fini, fini balu monu iha dalan ninin, no manu sira mai no han tiha. Mateus 13:4
Grupu dahuluk mak: Fini neʼebé monu iha dalan ninin mak ema neʼebé rona liafuan kona-ba Maromak nia Ukun, maibé la komprende, no Diabu mai hasai buat neʼebé kuda ona iha ninia laran. Mateus 13:19
Grupu 2. Fini balu tan monu iha fatuk leten neʼebé iha rai uitoan deʼit, no fini sira-neʼe moris lalais tanba rai la kleʼan. Maibé kuandu loro-matan saʼe, loron manas kona fini sira-neʼe, no tanba sira-nia abut la naruk, sira sai namlaek no mate. Mateus 13:5-6
Kategoria grupu rona na'in daruak mak:
No fini neʼebé monu iha fatuk leten mak ema neʼebé rona liafuan kona-ba Maromak nia Ukun no nia simu kedas ho haksolok, maibé liafuan neʼe la iha abut iha ninia laran. Nia bele tahan ba tempu uitoan, maibé kuandu nia hasoru terus ka susar tanba liafuan neʼe, nia monu kedas. Mateus 13:20:21
Grupu 3. Fini seluk monu iha ai-tarak laran, no ai-tarak sira-neʼe sai boot no hanehan fini sira-neʼe. Mateus 13:7
Kategoria grupu Rona na'in datoluk mak:
Fini neʼebé monu iha ai-tarak laran mak ema neʼebé rona liafuan neʼe, maibé nia hanoin resin kona-ba moris iha mundu neʼe no rikusoin sai hanesan lasu ba nia, entaun buat sira-neʼe hanehan liafuan neʼe, no neʼe la fó fuan. Mateus 13:22
Grupu 4. Fini seluk tan monu iha rai neʼebé diʼak, no sira komesa fó fuan. Balu dala 100, balu dala 60, no balu seluk dala 30. Mateus 13:8
Kategoria grupu Rona na'in dahaat mak:
No fini neʼebé monu iha rai neʼebé diʼak mak ema neʼebé rona no komprende loloos liafuan neʼe. Nia fó fuan duni. Balu fó fuan dala 100, balu dala 60, no balu seluk dala 30.” Mateus 13:23
Harohan ba Maromak atu Na'i Maromak fó Nia espiritu santu matenek mai ita, atu ita laran labele sai fatuk, ka toos maibé prepara ita laran sai mamar hanesan rai isin atu nune'e Maromak Nia futarlia bele fó fuan iha ita nia laran.
Maromak nia liafuan iha Ebreu 3:15 hatete nune'e "“Se ohin loron imi rona ba ninia lian, imi keta sai ulun-toos hanesan iha tempu neʼebé imi-nia beiʼala sira provoka haʼu atu sai hirus tebes"
Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan
 |
| Mateus 13:3 |
0 comments:
Post a Comment