Pekadu nia hun mai hosi ita Nia laran (Mateus 15:18)

Estuda Na'i Jesus Nia moris no hanorin, ita bele aprende buat barak. Na'i Jesus foka Liu ba abut ba ita ema nia problema, mak ita nia laran. Maromak Nia liafuan iha Jeremias 17:9 dehan "Laran mak makerek liu fali buat hotu-hotu no perigozu. Sé mak bele hatene ida-neʼe?"

Ita nia problema barak liu mai hosi ita nia laran la'os hosi li'ur. Na'i Jesus kontra maka'as ema Farizeu sira tanba kondisaun sira nia laran.

Purezemplu ita lee iha  Mateus 23:25-26 "Susar ba imi eskriba no Farizeu sira, imi ema laran-makerek! Imi hamoos kopu no bikan nia liʼur, maibé iha laran nakonu ho hahalok kaan-teen no hanoin an deʼit. Imi Farizeu neʼebé matan-delek, hamoos uluklai kopu no bikan nia laran atu nuneʼe iha liʼur bele sai moos"

Na'i Jesus hanorin mai ita katak, ita ema nia problema mak ita Nia natureza hanesan ema maksalak. Maromak Nia liafuan iha João 8:34 dehan “Tebes haʼu hatete loloos ba imi: Ema neʼebé halo sala, nia atan ba sala". Kuandu ita sai atan ba Sala, kolen hosi sala mak mate (Roma 6:23). Tanba ne'e ita tenki harohan atu Maromak ajuda hamoos ita laran ne'ebé nakonu hó pekadu.

Maromak Nia liafuan iha Mateus 15:19-20 dehan nune'e "Husi laran mak mosu hanoin aat hanesan oho ema, adultériu, sala seksuál, naʼok, fó sasin falsu no koʼalia lia­fuan aat. Buat sira-neʼe mak hafoʼer ema. Maibé han hodi la fase liman la hafoʼer ema.”

Kristu Nia hanorin, kondena mudansa kulit li'ur de'it hanesan ema laran makerek, tanba Maromak hatene ema nia laran (kompara Mateus 23:1-36 hó Marku 7:1-13; Mateus 15:1-9)

Ita ema bele finje sai pastor ne'ebé di'ak, la'en ne'ebé di'ak ka fen ne'ebé di'ak, funsionariu ne'ebé di'ak iha publiku nia oin, maibé kuandu iha kotuk ita halo buat ne'ebé kontra Maromak Nia ukunfuan, Na'i Maromak mós hatene. Basá Maromak hatene ita nia laran (1Samuel 16:7).

Iha Maromak Nia futar oin, la iha buat ida mak ita ema bele subar. Mai ita moris banati tuir nai Jesus atu hadook an hosi hahalok laran makerek atu nune'e bainhira Na'i Jesus Mai fali ba daruak tuir nia promesa iha João 14:1-3 , ita hotu bele tama Reiñu Lalehan.

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Mateus 15:18