Na'i Jesus fó previzaun kona-ba milagre sira ne'ebé dixípulu sira sei haree. Bainhira ko'alia ba Nathanael, Na'i Jesus temi Israel, ne'ebé uluk hanaran Jacob. Iha Genesis 28:12, Jacob mehi kona-ba eskada entre Lalehan no rai no haree Anju sa'e tun iha eskada ne'e.
Na'i Jesus atu fó hatene ba Nia dixípulu sira kona-ba razaun ka objetivu Ninia misaun mai iha mundu: atu serbí hanesan ligasaun ka ponte entre Na'i Maromak no ema. Na'i Maromak Nia futarlia iha 1Timoteo 2:5 hatete "Tanba iha Maromak ida deʼit no iha mediadór ida entre Maromak no ema, neʼe mak, Kristu Jesus"
Iha João 1:51, Na'i Jesus Kristu mós uza liafuan "Oan-Mane" ne'ebé refere ba nia an rasik. Oan-mane refere ba profesia kona-ba Mesias iha Daniel 7:13 ne'ebé sei mai iha mundu. Ema Judeu sira ne'ebé rona liafuan "Oan-Mane" sira hatene hó loloos katak Nia refere ba Salvadór no Liurai Israel nian.
Espresaun "Oan-mane/Son of man" aparese ka mosu dala 81 iha Evanjellu haat (Mateus, Marco, Lukas no João). Liafuan Oan-mane mosu dala 30 iha Mateus, dala 14 iha Marco, dala 25 iha Lukas no dala 12 iha João.
Ema Farizeu sira ne'ebé mak la fiar Na'i Jesus hanesan Mesias, bainhira Na'i Jesus refere Nia an hanesan "Oan-mane" ne'ebé sei tur iha Aman Nia sorin loos no sei mosu iha kalohan leten sira hirus tebes (Mateus 26:64-66).
Oinsá hó ita? Dalaruma ita la hirus ka rejeita, maibé ita mós la simu Na'i Jesus iha ita nia moris loronloron, alias fiar ne'ebé la manas no la malirin (morna de'it). Ema ba igreja, ita mós ba; ema baku malu, ita mós baku malu; ema tolok, ita mós tolok; ema halo korupsaun, ita mós halo, etc.
Na'i Jesus ko'alia mai ita atu evita fiar tipe "morna". Na'i Jesus hatete, "Haʼu hatene ó-nia hahalok sira, katak ó la malirin no mós la manas. Haʼu hakarak ó sai hanesan bee malirin ka manas. Maibé, tanba ó morna deʼit no la manas ka malirin, entaun haʼu sei muta sai ó husi haʼu-nia ibun" Apokalipse 3:15-16
Mai ita enkoraje malu, atu estuda Na'i Jesus Nia hanorin iha Sagrada Bíblia no halo tuir. Hau Nia harohan atu bainhira Na'i Jesus mosu mai iha kalohan, ita nia fé manas hela.
**********************************
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
 |
| João 1:51 |
0 comments:
Post a Comment