Iha Lukas 16:19–31 Na'i Jesus konta istoria kona-ba Lazarus no ema-riku ida. To'o istoria ne'e nia rohan, Na'i Jesus hatete katak sira ne'ebé rejeita buat ne'ebé hakerek nanis ona iha eskritura, sei la konvensidu hó saida de'it, mesmu hó milagre resuresaun.
Na'i Jesus uza ideia ne'ebé hanesan bainhira responde ba ema Judeu sira nia kritika (João 5:18). Ema sira ne'e iha evidensia barak, inklui testamuña João Batista (João 5:33) no haree Na'i Jesus Nia milagre hó sira nia matan rasik (João 5:36). Inportante mós atu nota katak ema sira ne'ebé lakoi simu mensajen Na'i Jesus nian, sira ne'e mós ema matenek ka peritu kona-ba Eskritura. Sira hatene Kona-ba lei Moizes nian. Maibé sira rejeita nafatin Na'i Jesus no Nia mensajen. Ida ne'e akontese la'os tanba sira lahatene maibé finje ka hó hakarak rasik rejeita Lia Loos (João 5:39–40).
Na'i Jesus Kritika lideransa relijioza sira. Sira hatete katak sira fiar ba liafuan ne'ebé Moizés hakerek - maibé Na'i Jesus bolu ema sira ne'e bosok-teen. Tanbasá? Tanba antigu Testamentu halo prediksaun kona-ba Na'i Jesus no ema Farizeu sira nafatin la simu Na'i Jesus. (João 5:38–40), sira la iha interese atu hatene Kona-ba Na'i Maromak Nia hakarak. Sira prekupa liu kona-ba ema nia lei ka regulamentu no tradisaun ema nian (Mateus 15:6–9).
Oinsá ho ita? Dalaruma ita hatene Na'i Maromak Nia futarlia (liuhosi lee rasik Bíblia ka liuhosi Na'i Maromak Nia servidór sira ne'ebé haklaken Lia Loos, maibé tanba la kondiz hó ita nia tradisaun ka prátika relijiaun nian, ita ignora Na'i Jesus Nia Lia Loos.
Mai ita enkoraje malu atu simu Lia Loos Na'i Jesus nian iha Eskritura.
✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
 |
| João 5:46 |
0 comments:
Post a Comment