Promesa Na'i Maksoin Mai moris iha ita leet

Haʼu sei halo ó  no feto neʼe sai inimigu ba malu, nuneʼe mós ho ó-nia jerasaun  no ninia jerasaun. Nia sei harahun ó-nia ulun, no ó sei hakanek ninia ain-tuban.” Génesis 3:15

Seráke ita boot hatene katak promesa dahuluk Na'i Maromak halo mak  promesa Na'i Maromak nian kona-ba Na'i Maksoin ne'ebé sei mai moris iha mundu ne'e.

Iha Genesis, ita lee katak bainhira Adão no Eva monu ba sala iha Jardin Eden, ita ema haketak an hosi Maromak Nia prezensa. Sala halo ita sai fo'er. Maibé Na'i Maromak ne'e santu no perfeitu tan ne'e Na'i Maromak labele iha relasaun hó buat ne'ebé inpuru (fo'er).

Separasaun ida ne'e halo Na'i Maromak Nia laran moras, tanba Nia hadomi ita liu buat hotu. Tan Nia domin ne'ebé boot, hafoin ita ema monu ba sala,  imediatamente, Na'i Maromak halo planu atu halo rekonsiliasaun entre ita hó Maromak.  Houri uluk kedas, desde ezistensia ita ema iha mundu, Na'i Jesus hola parte kedas iha ita nia istoria.

Na'i Maromak permiti Satanas hatene, kona-ba planu ida ne'e.  Na'i Maromak hatete "Haʼu sei halo ó  no feto neʼe sai inimigu ba malu, nuneʼe mós ho ó-nia jerasaun  no ninia jerasaun. Nia sei harahun ó-nia ulun, no ó sei hakanek ninia ain-tuban.” Génesis 3:15

Tuir promesa ida ne'e, to'o tempu ida, iha jerasaun Eva nian, sei moris Salvadór ida ne'ebé sei halakon podér Satanas nian ne'ebé separa ema hosi Maromak. Satanas tenta atu hapara Salvadór ne'e, maibé Salvadór ne'e sei harahun nia ulun

Kristu moris,  hanesan  inisiu ba prosesu restaurasaun ba relasaun ne'ebé kotu iha momentu Adão no Eva liuhosi aliansa foun. Mundu hein Mesias ne'ebé atu mai tinan rihun ba rihun, to'o ikus mai, Na'i Mesias mai moris duni iha ita leet (Emanuel). Moris hanesan ita ema (João 1:14) atu fó salvasaun ba ita.

Mai ita simu Na'i Jesus atu mai moris iha ita Nia Uma kain idaidak atu ita moris iha dame nia laran no liuliu atu Na'i Jesus mai moris iha ita nia fuan no laran loronloron la'os tinan ida dala ida.

**********************************
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane  mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

Génesis 3:15