Eskritura xave: 1 Korinto 15: 35-41
Maibé ema balu sei husu, “Oinsá mak ema mate moris hias? Sira mai fali ho isin lolon oinsá?” 1 Korinto 15:35
Serake Ita pernah hanoin kona-ba pergunta ne'e?
"Se ema ida mate no hakoi, oinsá mak nia bele moris fali? No nia sei iha isin oinsá?
Paulo hatán pergunta ne'e hodi uza ezemplu simples husi natureza.
Haree ba fini ida:
Kuandu toos-nain ida kuda fini iha rai, fini ne'e la haree hanesan ai-horis ida ne'ebé sei moris mai hosi fini ne'e.
Fini ki'ik ida bele haree maran no la iha moris. Maibé bainhira kuda ona ba rai, buat furak ida akontese. Maromak fó moris foun ba nia, no ai-horis furak ida krexe.
Paulo hatete katak ida-ne'e hanesan mós moris-hias (1 Korinto 15:36-38).
La'ós isin ne'ebé hakoi ona mak sei sai isin ne'ebé sai husi rate. Maromak sei fó isin lolon foun moris-hias nian ba Ninia povu.
Paulo mós fó ezemplu husi Maromak Nia kriasaun. Loro-matan, fulan no fitun, sira iha glória ne'ebé la hanesan. Maromak fó isin oioin no glória oioin (1 Korinto 15:39-41).
Mensajen ne'e simples:
Maromak hatene oinsá atu fó isin-lolon foun mai ita.
Karik ita la komprende oinsá mak Maromak sei halo ida-ne'e, maibé ita bele tau fiar ba Nia.
Saida mak Ninia signifikativu ba ita ema Kristaun ohin loron?
Ema balu preokupa kona-ba sira-nia isin-lolon.
Karik Ita sai ferik no katuas ona. Ita-nia matan sai fraku ona. Ita-nia isin sai kole lalais ona. Karik Ita sofre moras ruma. No loron ida, ema hotu sei fila fali ba rai-rahun.
Maibé ne'e la'ós rohan ba sira ne'ebé partensi ba Jesus.
Ikusmai Paulo esplika kona-ba ita-nia isin hanesan tuir mai ne'e "Nunee mós ho sira neʼebé moris-hias hosi mate. Buat neʼebé ita kuda bele dodok, no buat neʼebé moris-hias ona sei nunka sai dodok." 1 Korinto 15:42. Buat neʼebé kuda la iha onra, maibé nia moris-hias ho glória. Buat neʼebé kuda ne'e fraku, maibé nia moris-hias ho kbiit: 1 Korinto 15:43
Imajina to'ok kona-ba kuda fini kiik-oan ida no depois moris sai ai-huun furak ida. Fini no ai-huun ne'e iha ligasaun, maibé ai-huun ne'e boot liu fali fini ne'ebe ita kuda.
Nune'e mós, ita-nia isin-lolon moris-hias nian sai di'ak liu fali ita-nia isin ida ne'ebé hakoi ba rai.
Tan ne'e, kuandu ita haree ema idozu ida ne'ebé difisíl atu la'o ba mai, keta hamnasa ka hatún sira. Hanoin-hetan katak Maromak promete ona buat ne'ebé di'ak liu.
Kuandu ita haree ita-nia aan ne'ebé ferik ka katuas ba dadauk keta deskorajen, ita bele hanoin kona-ba moris-hias.
Bainhira ita hamriik besik rate hosi ema fiar-na'in ne'ebé mate iha Kristu, hanoin-hetan katak rate ne'e la'ós rohan.
No kuandu ita hasoru tentasaun atu hanoin: "Hau-nia moris la iha signifikasaun," hanoin-hetan katak Maromak prepara ona futuru ne'ebé sei la iha tan tanis, matan-been no mate.
Karik ita la hatene ho loloos oinsá mak ita-nia isin-lolon moris-hias nian. Maibé ita hatene se mak sei fó buat sira-ne'e ba ita: ne'e mak Maromak rasik.
Moris-hias la'ós ema nia ideia. Ne'e mak Maromak Nia promesa.
Loron ida, Jesus sei fila fali mai. Ema ne'ebé mate iha Kristu sei moris hi'as fali, no Maromak sei fó ba sira isin-lolon foun ne'ebé sei nunka sai ferik-katuas, moras, ka mate (1 Korinto 15:51-54; 1 Tesalonika 4:16-17).
Tan ne'e, se ita la'o ho Kristu, keta ta'uk ba futuru.
Ita-nia isin bele fila fali ba rai, maibé Maromak Nia promesa sei la fila mamuk.
Mai ita tau fiar ba Jesus, moris ho fiél ohin, no hein loron ne'ebé Maromak sei halo buat hotu sai foun.
Bainhira ita hein eventu moris-hias ne'ebé gloriozu, mai ita kontinua la'o ho fiél iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment