Eskritura prinsipál: 1 Korinto 13: 1-7; 1 Pedro 4: 8-11
Domin ne'e mak pasiénsia no laran di'ak. Domin la laran moras. Domin la gaba aan ka foti aan. Domin hatudu respeitu. Domin la buka atu manaan mesak de'it. Domin la sai hirus lalais no la sura sala ne'ebé hasoru nia. Domin la haksolok ho hahalok aat, maibé haksolok ho lia loos. Domin lori todan hotu, fiar buat hotu, espera buat hotu no tahan buat hotu. 1 Korinto 13:4-7
Maromak fó prezente espirituál oioin ba ninia povu. Balu bele haklaken. Balu bele hanorin. Balu bele kanta. Balu bele fó korajen ba ema seluk. Balu laran di'ak atu ajuda ema kiak ka vizita ema moras. Prezente hotu-hotu importante.
Maibé Biblia hanorin katak iha buat ida ne'ebé importante liu fali prezente espirituál sira hotu. Ne'e mak domin.
Apóstolu Paulo hatete katak, maski ita ko'alia furak tebes, kompriende lia-loos barak tebes, ita iha fé ne'ebé boot tebes, ka ita fó buat hotu ne'ebé ita iha, maibé se ita la iha domin, ita-nia hahalok di'ak sira ne'e sei la vale buat ida (1 Korinto 13: 1-3). Ne'e katak ita-nia prezente ka talenta sira-ne'e la iha folin se ita la uza ho domin.
Iha realidade moris nian, domin haree hanesan saida?
Bíblia hatete katak domin mak pasiénsia no laran-di'ak. Domin la foti-an ka hanoin an deit. Domin la sai hirus lalais. Domin fó perdua no ko'alia lia-loos. Domin nunka rende an (1 Korinto 13: 4-7).
Apóstolu Pedro mós hatete: "Liu-liu hakaas aan atu hadomi malu, tanba domin mak taka sala barak liu." 1 Pedro 4:8. Tuirmai, nia haruka ema kristaun sira atu uza sira-nia talenta atu serbí malu ho fiél (1 Pedro 4: 10). Ida-ne'e hatudu katak Maromak la fó prezente espirituál sira-ne'e atu halo ita sai famozu. Talenta sira ne'e Maromak fó atu uza hodi ajuda ema seluk.
Hanoin to'ok kona-ba ema ida-ne'ebé haklaken liafuan ne'ebé iha podér boot maibé la respeitu ema iha ninia uma-laran. Ka ema ne'ebé kanta knananuk furak tebes iha igreja maibé lakohi fó perdua ba ema seluk. Sira-nia prezente ka talenta sira-ne'e bele influensia ka fo impresaun ba ema seluk, maibé se buat sira ne'e la halo ho domin, Maromak sei la kontente.
Jesus mak ita-nia ezemplu ne'ebé perfeitu. Nia kura ema moras sira, hanorin lia-loos, fó-han ema hamlaha, no fó ninia moris iha krús tanba nia hadomi ita. Nia halo buat sira ne'e hotu tanba domin.
Ohin loron, husu ba ita-nia an: "Serake ha'u uza ha'u-nia prezente atu serbí ema seluk ka atu hetan gaba?" Talenta saida de'it ne'ebé Maromak fó mai ita, uza talenta sira ne'e ho laran-di'ak, haraik-an no domin.
Ema bele haluha ita-nia liafuan, knananuk, ka talentu. Maibé sira sei hanoin oinsá ita trata sira. Ema ne'ebé hatudu domin mak sai nu'udar sasin ne'ebé forte liu ba Jesus.
Bainhira ita uza ita-nia talenta sira ho domin hanesan Kristu, ita kontinua la'o hamutuk iha Dalan ba Lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment