Nia ne'ebé fó bensaun gratis deit sei sai bokur, no nia ne'ebé foló bee sei hetan fali bee. Provérbiu 11:25 BK
Uma pessoa generosa prosperará e quem largamente der, largamente receberá. PROVÉRBIOS 11:25
Versíkulu ne'e signifika saida?
Versikulu ne'e hanorin ita lisaun simples ida: kuandu ita haraik bénsaun ba ema seluk, ita mós sei hetan bénsaun. Ida-ne'e la dehan katak ita fó buat ruma ba ema tanba ita hakarak Maromak fó osan ka buat ruma ba ita. Ita fó tanba Maromak haraik ona bénsaun mai ita, no Ninia domin hanorin ita atu fahe bénsaun ne'ebé ita iha.
Hanoin to'ok kona-ba ema ne'ebé rega ai-horis iha rai maran. Ai-horis ne'e sai fresku no krexe. Nune'e mós, kuandu ita ajuda ema ne'ebé hasoru susar ruma, ita mós bele fó esperansa no forsa ba ema neʼe nia moris.
Maibé oinsá mak ema ida bele hatudu laran-luak iha sira-nia moris loroloron nian?
Ne'e bele simples loos.
Se Ita-nia viziñu moras, vizita sira ka ajuda sira-nia serbisu ruma.
Se ema ruma la iha ai-han, fahe ai-han balu ho sira.
Se labarik ida la iha materiál eskola, ajuda se ita bele.
Se ema idozu ida presiza ajuda atu lori buat ruma, ajuda sira.
Se ema ida triste, rona sira-nia halerik duke ignora sira.
Se ema ruma halo sala ruma, korrije sira ho laran-diak duke goza sira.
Se ema ida presiza fó korajen, ko'alia liafuan di'ak ba sira.
Dala ruma laran-luak signifika fó osan. Maibé jenerosidade la'ós de'it kona-ba osan. Ita bele fó ita-nia tempu, forsa, koñesimentu, atensaun, perdua, no domin.
Porezemplu, profesór ida bele ajuda estudante ne'ebé hasoru problema estudu nian. Toos-nain ida bele ajuda ema seluk halo serbisu toos nian. Membru igreja ida bele vizita ema ida-ne'ebé para ona mai
igreja. Joven ida bele ajuda katuas ida uza telefone. Família ida bele fahe hahán ho família seluk.
Jesus hatudu ezemplu di'ak liu hotu ba ita. Nia la moris ba nia an rasik de'it. Nia ajuda ema moras sira, fó-han ba sira ne'ebé hamlaha, fó komfortu ba sira ne'ebé triste, no ikusmai fó ninia moris ba ita (Mark 10:45).
Dala ruma ita hatete: "Hau la iha buat barak, tan ne'e ha'u la bele ajuda." Maibé ita la presiza iha buat barak atu haraik bénsaun ba ema seluk. Maski ita-nia oin-midar, liafuan mamar, orasaun badak, ka ajuda uitoan de'it, ida-ne'e bele halo diferensa iha ema-nia moris.
Jesus hatete: ‘Haksolok liu atu fó, duké atu simu.’ Apostolu 20:35
Ohin, hateke ba ema sira ne'ebé hale'u ita. Husu ba ita-nia an: "Se mak presiza ha'u-nia ajuda?"
Keta hein to'o ita sai riku. Hahú ho buat ne'ebé ita iha. Fó buat ne'ebé Ita bele fó. Ajuda ema ne'ebé ita bele ajuda. Enkoraza ema ida. Fahe buat ne'ebé Maromak fó ona ba ita.
Kuandu ita sai bénsaun ba ema seluk, ita-nia laran sai riku liu ho domin, ksolok, no dame.
Mai ita la'ós de'it halo orasaun hodi dehan: "Maromak, haraik bénsaun mai ha'u." Mai ita mós halo orasaun hodi dehan: "Maromak, halo ha'u sai bénsaun ba ema ida ohin."
Bainhira ita fahe Maromak Nia domin liuhusi hahalok di'ak, ita kontinua la'o ho laran-metin iha dalan ba lalehan.
🙏 MAROMAK FO BENSAUN🙏🏻
Click iha ne'e Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow
dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment