Eskritura Prinsipál:
Apóstolu sira fó sai sira-nia testemuña ho kbiit maka'as kona-ba Nai Jesus moris-hias ona. No sira hotu simu grasa boot. Apostolu 4:33
Dixipulu sira sai nu'udar sasin espesiál kona-ba Jesus Nia moris-hias. Sira haree Jesus hafoin nia moris-hias husi mate. Sira han hamutuk ho Nia, ko'alia ho Nia, no kaer Nia isin. Pedro hatete: "Ami sai sasin kona-ba buat sira-ne'e hotu" (Apos 5: 32).
Maibé ohin loron, maizumenus tinan 2,000 liu ona. Ita la iha ne'ebá bainhira Jesus sai husi rate.
Entaun, oinsá mak ita bele sai sasin kona-ba Ninia moris-hias?
Resposta primeiru mak simples: ita bele fó sasin ba buat ne'ebé Biblia hatete mai ita.
Apóstolu sira haklaken katak Jesus mate, ema hakoi Nia no Nia moris-hias fali (Apos 2: 32; 3:15). Sira hakerek sira-nia sasin sira ne'e iha Biblia atu nune'e ema husi jerasaun hotu bele rona liafuan di'ak ne'e.
Maibé atu sai sasin la'ós de'it atu repete versíkulu sira husi Biblia.
Ita-nia moris ne'ebé transformadu mós bele sai sasin.
Antes Jesus hasoru Paulo, nia halo funu hasoru ema kristaun. Maibé depoisde hasoru Kristu, ninia moris muda kompletamente (Apos 9: 1-6, 17-20).
Jeus ne'ebé hanesan bele mós muda ita-nia moris ohin loron.
Se Jesus fó perdua ona ba ita, fó-hatene ema kona-ba ida ne'e.
Se Jesus ajuda Ita hapara Ita-nia toman aat atu halo sala, fahe Ita-nia istória.
Se Jesus fó dame ba ita durante tempu susar, fó-hatene ba ema seluk oinsá ita tau fiar ba Nia.
Se Jesus ajuda Ita atu fó perdua ba ema ruma, husik ema haree mudansa ne'e.
Ita-nia moris labele prova kona-ba Jesus Nia moris-hias hanesan apóstolu sira fó sasin. Maibé ita-nia moris ne'ebé transformadu bele hatudu katak Jesus ne'ebé moris hi'as ona sei serbisu nafatin iha Ita-nia moris to'o ohin loron.
Oinsá mak ita bele sai sasin iha ita-nia moris loroloron nian?
Iha uma, halo orasaun hamutuk ho Ita-nia família no hanorin Ita-nia oan sira kona-ba Jesus.
Iha serbisu fatin, hatudu onestidade, maski fasil liu atu bosok.
Kuandu ema ruma hetan terus, ajuda sira no halo orasaun ba sira.
Bainhira ema ruma husu tanbasá mak ita moris diferente, keta moe. Hatete de'it dehan: "Hau tuir Jesus tanba Nia muda ona ha'u-nia moris."
Iha igreja, serbí ema seluk duke buka atu hetan serbí.
No bainhira ita iha oportunidade, fahe mensajen simples: "Jesus mate tanba ita-nia sala sira. Nia moris-hias fali. Agora Nia moris hela, no Nia sei mai fali."
Pedro hatete katak ita tenke sempre prontu atu hatán kona-ba esperansa ne'ebé ita iha, maibé ita tenke halo ida-ne'e "ho haraik-an" - ho laran-di'ak no respeitu (1 Pedro 3:15).
Ita la presiza sai pregadór famozu atu bele sai sasin ba ema. Ita la presiza lisensiatura hosi universidade atu bele haklaken. Ita presiza hatene de'it Jesus, moris ba Jesus, no fó-hatene ema seluk kona-ba Jesus.
Apóstolu sira fo sasin kona-ba buat sira ne'ebé sira haree ona. Ita fo sasin kona-ba saida mak ita aprende ona husi Maromak nia Liafuan no buat ne'ebé Jesus halo daudauk iha ita-nia moris.
Ohin, husu ba ita-nia an: "Se ema ida haree ha'u-nia moris, serake sira bele haree katak ha'u fiar ba Jesus ne'ebé moris?"
Espera katak, ita-nia liafuan, ita-nia hahalok, ita-nia laran-di'ak, ita-nia onestidade, no ita-nia moris ne'ebé transformadu ona sei lori ema ba Kristu ne'ebé moris hi'as ona.
Nu'udar sasin ba Jesus ne'ebé moris, mai ita fahe Ninia esperansa ba ema seluk no la'o hamutuk iha Dalan ba Lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment